Hewlêr (Rûdaw) - Îro bihayê Bitcoinê daket û bi kêmtirî ji 70 hezar dolarî dan û standin pê tê kirin.
Doh Bitcoinê karîbû beşek ji zirarên hefteya borî telafî bike û derkete ser 70 hezar dolarî lê îro hêza xwe winda kir.
Bihayê Bitcoinê nêzîkî 1000 dolaran daket û niha bi 69 hezar û 200 dolarî dan û standin pê tê kirin.
Hêjayî gotinê ye ku bihayê Bitcoinê çend rojên borî daketibû bin 61 hezar dolarî.
Sedema daketinê çi ye?
Li gorî şirovekaran, sedema daketina bihayê Bitcoin û pereyên din ên dîjîtal, pêşbîniyên li ser kêmbûna pereyê kaş (lîkîdîte) ê li bazarê ye.
Bitcoinê piştî ku Serokê Amerîkayê Donald Trump hat ser desthilatê hemû qazancên xwe winda kirin û tê pêşbînîkirin ku daketin berdewam bike.
Analîstê amaran ê şîrketa şêwirmendiyê ya Kaikoyê (taybet bi pereyên dîjîtal) Tamas Probs li ser mijarê got:
"Çend meh in bihayê Bitcoinê dadikeve û ev jî nîşaneya wê yekê ye ku dê daketin berdewam bike."
Tamas Probs her wiha got, "Kêmbûna lîkîdîteyê tê wateya tevlihevî û necîgiriya bihayê Bitcoinê."