Hewlêr (Rûdaw) - Onsa zêr îro bi nêzîkî 4 hezar û 190 dolarî ye û ev biha ev çend roj in zêde naguhere.
Îro civîna durojî ya Komîteya Bazara Vekirî ya Banka Navendî ya Amerîkayê (Fed) a li ser rêjeya faîzê dest pê dike û sibe biryarê radigihînin.
Ji ber vê yekê bazirgan bi baldarî tevdigerin.
Onsa zêr di paymanên paşerojê de jî bi nêzîkî 4 hezar û 220 dolarî ye.
"Zêr dikare bigihe 5 hezar dolaran"
Serokê Beşa Stratejiyê yê Şirketa Zaner Metalê Peter Grant li ser mijarê got:
"Bazar li benda biryara Banka Navendî ya Amerîkayê ya li ser faîzê ye.
Bingehên bazara zêr bihêz in û di çaryeka yekem a sala 2026an de bihayê zêr dikare bigihe 5 hezar dolaran."
Li gorî rapirsiyan, bazirgan şansê kêmkirina faîzê ji sedî 90 dibînin.
Banka Navendî ya Amerîkayê sibe demjimêr 21:00ê (bi dema Kurdistanê) biryara xwe ya li ser faîzê eşkere dike.
Serokê Bankê jî dê piştî eşkerebûna biryarê konferanseke rojnamegeriyê li dar bixe û li ser civîna xwe ronîkirinê bike.
