Hewlêr (Rûdaw) - Platforma medyaya civakî Xê, dest bi rakirina "tîkên şîn" ên hinek rayedarên Îranê kir.
Ev gav piştî angaştên ku X xizmeta bi pere dide rayedarên Îranî yên di bin dorpêçên aborî de ne, hat avêtin.
Di nav kesên ku tîka wan a şîn hatiye rakirin de Wezîrê Karên Derve yê Îranê Ebas Eraqçî jî heye.
Raporek bû sedema rakirina tîkan
Ev biryar piştî raporeke "Tech Transparency Projectê" hat dayîn.
Di raporê de hatibû îdiakirin ku Xê xizmeta "X Premium"ê ya bi pere pêşkêşî kesayetiyên Îranî yên ku di bin dorpêçan de ne kiriye.
Rayedarên ku tîka wan a şîn hatiye rakirin
Di nav kesên ku tîka wan a şîn hatiye rakirin de Wezîrê Karên Derve yê Îranê Ebas Eraqçî, Serokê Dadweriyê Xulamhuseyîn Muhsînî Ejeî û Sekreterê Giştî yê Encumena Bilind a Ewlehiya Neteweyî Elî Larîcanî jî hene.
Dorpêçên Amerîkayê yên li ser Îranê, qedexe dike ku şirketên Amerîkayî bi hinek kes û saziyan re têkiliyên bazirganiyê deynin.
Platforma Xê heta niha li ser mijarê ti daxuyanî nedaye.
Şirketa Xê ya ku xwediyê wê milyarderê Amerîkayî Elon Musk e, berê jî di platformê de alaya Îranê guhertibû.
Li şûna alaya fermî, alayeke kevn a ku komên alîgirên monarşiyê yên li dijî hikûmetê bi kar tînin bi kar anîbû.