Hewlêr (Rûdaw) - Hikûmeta Fransayê stratejiya xwe ya ji bo sala 2030î belav kir.
Hikûmeta Fransayê tê de ji welatiyan dixwaze ku ji bo parastina jîngeh û tenduristiya xwe kêmtir goşt bixwin.
Ev yek bû sedema dilgiraniya ajeldarên Fransayê.
Hikûmeta Fransayê di çarçoveya "Stratejiya Niştimanî ya ji bo Xwarin, Xwarina Tendurist û Avhewayê" de rapora xwe belav kir.
Armanca sereke ya raporê ew e ku heta sala 2030î di navbera pergala xwarineke tendurist û kêmkirina gaza karbonê de hevsengiyekê ava bike.
Divê ev rapor sala 2023î bihata belavkirin lê ji ber xwenîşandan û zexta cotkar û ajeldaran hatibû bipaşxistin.
Ajeldaran hikûmet bi wê yekê tohmetbar dikir ku "gefê li debara jiyana wan dixwe."
Ev biryar li welatekî ku bi xwarina "goşt û kartolan" tê naskirin bû sedema karvedanên zêde.
Li gorî amarên zanistî, hilberîna xwarinê berpirsyara ji sedî 25ê gaza karbonê ya li Fransayê ye.
Di nav vê rêjeyê de para hilberîna goşt bi tenê du li ser sêyan e.
Fransa û Amerîka: Du polîtîkayên berovajî hev
Ev rênimayên nû yên Fransayê mehekê piştî biryara hikûmeta Amerîkayê ya di bin serokatiya Donald Trump de hatin ragihandin.
Trump berovajî vê yekê welatiyên xwe teşwîq dike ku goştê sor û berhemên şîr ên birûn bixwin.
Li gorî rênimayên nû yên Fransayê, hikûmet xelkê teşwîq dike ku zêdetir fêkî, sebze û giyayan bixwin.
Her wiha tekezî li ser "sînordarkirina" xwarina hemû cureyên goşt û "kêmkirina" goştê hawirde tê kirin.
Berteka komeleyên tenduristiyê
Stephanie Piretê ji Komeleya France Assos Santeyê ragihand:
"Em kêfxweş in ku di dawiyê de ev plan hat belavkirin.
Em ditirsiyan ku were piştguhkirin lê me hêvî dikir ku plan ji vê wêrektir bûya."
Ev rênima tenê çend rojan berî vekirina Pêşangeha Çandiniyê ya Fransayê ya 21ê Sibatê hatin belavkirin.
Di vê pêşangehê de Serokkomarê Fransayê Emmanuel Macron her tim rûbirûyî hêrsa cotkaran dibe.
Ajeldarên Fransayê ji bilî kêmkirina goşt, ji îmzekirina peymana bazirganiya azad a di navbera Yekîtiya Ewropayê û welatên Amerîkaya Başûr de jî dilgiran in.
Ew bawer dikin ku dê ev peyman bibe sedema belavbûna goştê erzan di bazarên Fransayê de û dê zererê bide hilberîna navxwe.