Hewlêr (Rûdaw) - Di çarçoveya kampanyaya "Renca Rûdaw" de ku Tora Medyayî ya Rûdawê dabû destpêkirin, karwanê yekem ê alîkariyan gihîşt Rojavayê Kurdistanê.
Karwanê mezin ê ku ji 80 barhilgiran pêk tê û xwarin, derman û pêdiviyên serekî bar kirine, di Deriyê Sînorî yê Sêmalkayê re derbasî Rojavayê Kurdistanê bû da ku bigihîje destê kesên hewcedar.
Karwanê yekem ê alîkariyê ku bi bexşên xêrxwaz û karsazan di çarçoveya kampanyaya hevgirtinê ya li dijî krîza mirovî ya li Sûriye û Rojavayê Kurdistanê, li Herêma Kurdistanê hatibû amadekirin, îro di deriyê Sêmalka-Pêşabûr re derbasî axa Rojavayê Kurdistanê bû.
Karwanê duyem ji Hewlêrê bi rê ket
Piştî derbasbûna karwanê yekem, qonaxa duyem a kampanyayê dest pê kir û îro serê sibehê karwaneke nû ya ji 50 barhilgiran pêk tê li Hewlêrê bi çepikan hat birêkirin.
Bi vî awayî, hejmara barhilgirên alîkariyê yên ku di çarçoveya kampanyaya "Renca Rûdaw" de ji bo herêmê tên şandin, di demeke kurt de gihîşt 130î.
Naveroka alîkariyan
Di nav barhilgiran de ji ber sermaya zivistanê, sotemenî û betanî ku girîngiyeke wan a jiyanî heye, her wiha ard, şîrê zarokan û kelûpelên tenduristiyê yên bilez cih digirin.
Tora Medyayî ya Rûdawê bi navê "Renca Rûdaw" kampanyayeke berfireh a alîkariyê dabû destpêkirin.
Ev kampanya bi hevahengiya lojîstîkî ya Dezgeha Xêrxwaziyê ya Barzanî (BCF) tê birêvebirin û tê çaverêkirin ku alîkariyên hatine komkirin, di serî de ji bo koçberên li Kobanî û Hisîçayê, li herêmên ku herî zêde pêdiviya wan pê heye bên belavkirin.
WÊNE - Karwanê yekem ê barhilgirên Renca Rûdawê derbasî Rojavayê Kurdistanê bû
— RudawKurdi (@RudawKurdi) January 28, 2026
💢 Barhilgirên karwanê yekem ê alîkariya xêrxwazên Başûrê Kurdistanê yên ji bo Kampanyaya Renca Rûdawê di Deriyê Pêşabûrê re derbasî Rojavayê Kurdistanê bû#Rojava
📸Bilind Tahir / Rûdaw pic.twitter.com/lOVghcKxME