Hewlêr (Rûdaw) - Konsulxaneya Giştî ya Amerîkayê ya Hewlêrê, bi awayekî fermî bidawîhatina pêvajoya valakirina avahiya xwe ya kevn a li navçeya Enkaweyê ragihand.
Ev avahî zêdetirî 14 salan wekî navendeke sereke ya dîplomatîk a li Herêma Kurdistanê hate bikaranîn.
Li gorî daxuyaniya fermî ya Konsulxaneyê, ji 1ê Sibata 2026an ve birêvebirina avahiyê bi temamî radestî şaredarî û xwediyên malan hat kirin.
Konsulxaneyê ji bo piştgiriya wan a di van salan de spasiya Qaymeqamê Hewlêrê Nebaz Ebdulhemîd û karmendên wî kir.
Ev gav li gorî peymana her du aliyan a meha Gulana 2025an hate avêtin.
Konsulxaneya Amerîkayê li ser daxwaza şaredariya Enkaweyê, binesaziya karebayê û dîwarên ewlehiyê wekî xizmetguzarî ji şaredariyê re hiştin.
Her wiha ji destpêka vê mehê ve kontrola deriyê li ber benzînxaneya Babîlê radestî şaredariyê hate kirin û rêyên din jî dê li gorî plana şaredariyê werin vekirin.
Konsulxaneya Amerîkayê li ser valakirina avahiya xwe ragihand:
"Niha xwediyên milkan dikarin bi temamî bigihêjin malên xwe.
Berpirsyariya parastina ewlehiya taxê jî ji Konsulxaneyê radestî hêzên polîs û asayîşê hat kirin."
Valakirina avahiya kevn piştî wê yekê tê ku Amerîkayê 3yê Kanûna Pêşîn a 2025an avahiya xwe ya nû û mezin a li ser rêya navçeya Pîrmamê bi fermî vekir.
Avahiya nû ya li Hewlêrê wekî konsulxaneya Amerîkayê ya herî mezin a li cîhanê tê dîtin.
Mesrefa avakirina wê 796,1 milyon dolar e û li ser rûberê zêdetirî 202 hezar metre çargoşe hatiye avakirin.
Konsula Giştî ya Amerîkayê ya Hewlêrê Gwendolyn Greenê di dema vekirina avahiya nû de gotibû:
"Bidawîhatina vê kompleksa nû, pêbendiya me ya ji bo nûnertiya Amerîkayê ya bi serbilindî û duristî ducare dike.
Ev yek dibe belgeya pêwendiyên me yên berdewam ên li gel Herêma Kurdistanê."
Konsulxaneya nû dikare 188 karmendan bihewîne û heft ajans û wezaretên cuda yên Amerîkayê tê de dixebitin.