Hewlêr (Rûdaw) - Mezlûm Ebdî ji bo hatina meha Remezanê peyamek belav kir.
Fermandarê Giştî yê Hêzên Sûriyeya Demokratîk (HSD) Mezlûm Ebdî di peyama xwe de daxwaza vegera koçberan û xurtkirina bihevrejiyanê kir.
Mezlûm Ebdî di destpêka peyama xwe de meha Remezanê li hemû cîhana Îslamê pîroz kir û hêvî kir ku ev meh bibe meha rehmet, aştî û aramiyê ji bo hemû mirovan.
Ebdî di peyama xwe de şehîd û birîndarên şer û malbatên wan bi bîr anîn û rêz li keda wan girt.
Banga ji bo bihevrejiyanê
Fermandarê HSDyê di peyama xwe de bal kişand ser pêwendiyên di navbera pêkhateyên Sûriye û Rojavayê Kurdistanê de û banga “xurtkirina ruhê bihevrejiyanê kir.”
Mezlûm Ebdî xwest ku “hemû Sûriyeyî ji gotara kîn û nefretê dûr bikevin û li ser bingeha rêzgirtinê paşeroja xwe ava bikin.”
'Bila koçber vegerin malên xwe'
Yek ji xalên herî girîng ên daxuyaniya Ebdî vegera koçberan a ser mal û milkên wan bû û hêvî kir ku “ev meha pîroz bibe wesîleyeke xêrê da ku koçberên Efrîn, Serê Kaniyê û hemû herêmên din ên Sûriyeyê di demeke nêzîk de vegerin malên xwe.”
Mezlûm Ebdî peyama xwe bi daxwaza xêr û xweşiyê ya ji bo hemûyan bi dawî kir.