Hewlêr (Rûdaw) - Wezareta Parastinê ya Îranê ragihand ku Hêzên Deryayî yên Tehran û Rûsyayê li Deryaya Umanê dest bi tetbîqateke leşkerî ya hevpar kir.
Li gorî medyaya fermî ya Îranê, keştiyên şer ên her du welatan li Bendera Bender Ebasê ya xwedî girîngiya stratejîk li hev civiyan û dest bi tetbîqatê kir.
Ev tetbîqata ku gelek keştiyên şer (muhrîb) û dron beşdar bûne, di demekê de tê kirin ku rageşiya jeopolîtîk a li herêmê zêde bûye.
Rageşiya di navbera Washington û Tehranê de
Ev daxuyaniya Wezareta Parastinê ya Îranê piştî daxuyaniyên Serokê Amerîkayê Donald Trump ên li ser bernameya nukleer a Îranê hat dayîn.
Trump diyar kiribû, eger birêvebiriya Tehranê şertên Amerîkayê qebûl neke dê rastî “encamên giran” were.
Nûçeyên li ser bicihkirina du keştiyên balafiran ên Amerîkayê li herêmê, şîroveyên wekî “koordînasyona leşkerî ya di navbera Tehran û Moskowê de xurt dibe” jî bi xwe re anîn.
Rayedarên Îranê diyar dikin ku armanca sereke ya tetbîqata leşkerî dabînkirina ewlehiya rêyên deryayî û parastina veguhastina enerjiyê ye.