Hewlêr (Rûdaw) - Serokwezîrê Îsraîlê Benjamin Netanyahu di demekê de ku êrişên li Îranê didomin peyamek bi Farisî belav kir.
Netanyahu di peyama xwe de got ku ew dê bi hezaran hedefên birêvebiriya Tehranê bombebaran bikin.
Netanyahu li ser hesabê xwe yê Xê ya peyameke vîdyoyî ya bi Farisî belav kir.
Ev vîdyo bi hişê çêkirî hatiye amadekirin û wî tê de bangî gelê Îranê kir.
"Dakevin kolanan"
Netanyahu îdia kir ku ew dê di rojên pêş de êrişî bi hezaran hedefên birêvebiriya Tehranê bikin.
Wî bangî gelê Îranê kir û got, "Em dê şert û mercên pêwîst ava bikin da ku gelê wêrek ê Îranê ji zincîrên zilmê rizgar bibe."
Serokwezîrê Îsraîlê diyar kir ku civaka Îranê "derfeteke mezin a ku di nifşekê de carekê tê" bi dest xistiye.
Wî tekez kir ku divê gel derkeve kolanan û li dijî birêvebiriya Tehranê dest bi xwenîşandanan bike.
Netanyahu got, "Dema wê hatiye ku hûn bi milyonan mirovî re dakevin kolanan da ku kar biqedînin û rejîma terorê ya ku jiyana we kiriye jehr hilweşînin."
Artêşa Îsraîlê beriya bi demeke kurt daxuyaniyek dabû.
Artêşê ragihandibû ku ji 28ê Sibatê ve cara ewil navenda Tehrana paytext û hedefên birêvebiriya Îranê hatine armanckirin.
در روزهای آینده ما به هزاران هدف رژیم تروریستی ضربه خواهیم زد.
— Benjamin Netanyahu - בנימין נתניהו (@netanyahu) March 1, 2026
ما شرایطو برای مردم شجاع ایران فراهم خواهیم کرد تا خود را از زنجیرهای استبداد رها کنن.
و به همین دلیل من دوباره خطاب به شما میگم:
ای شهروندان ایران این فرصت رو از دست ندهید.
این فرصتیست که فقط یه بار در هر نسل پیش… pic.twitter.com/JILOEzFjEx
Êrişên Amerîka û Îsraîlê yên li ser Îranê
Îsraîl û Amerîkayê 28ê Sibatê dest bi êrişên leşkerî yên li ser Îranê kir.
Ev êriş di demekê de hatin kirin ku dan û standinên di navbera birêvebiriyên Tehran û Washingtonê de didomiyan.
Îranê jî bi armanckirina hinek hedefan bersiv da.
Îranê ji bilî Îsraîlê, êrişî hedefên li Qeter, Îmarat û Behreynê kir ku baregehên Amerîkayê lê ne.
Di êrişên Amerîka û Îsraîlê de Rêberê Îranê Ayetulah Elî Xamineyî û gelek rayedarên bilind canê xwe ji dest da.
Heyva Sor a Îranê jî derbarê kuştiyan de daxuyaniyek da.
Heyva Sor doh ragihandibû ku di bombebaranan de 201 kesan canê xwe ji dest daye û 747 kes jî birîndar bûne.