Hewlêr (Rûdaw) - Bihayê zêr di roja yekem a dan û standinên sala nû de roja înê heta 4 hezar û 400 dolarî bilind bû lê di dema girtina bazarê de piraniya qezencên xwe winda kir.
Di dema girtina bazarê de onsa zêr tenê 9 dolaran bilind bû û bi 4 hezar û 332 dolaran dan û standin pê hat kirin.
Tê pêşbînîkirin ku di sala nû de, mîna sala 2025an pirsgirêkên jeopolîtîk û hêviyên ji bo kêmkirina faîzê bibin sedema bilindbûna bihayê zêr.
"Dê bihayê madenên biqîmet bilind bibe"
Şirovekarê Şirketa Şêwirmendiyê ya TD Securitiesê Bart Melek li ser mijarê got:
"Behsa kêmkirina faîzê di meha Adarê û mehên bê de tê kirin.
Her wiha nezelaliyên têkildarî pênaseyên gumrikê û qebareya deynên Amerîkayê di rojevê de ne.
Ev tişt dikarin bibin sedema bilindbûna zêdetir a bihayê zêr û madenên biqîmet ên wekî zîv û platînê."
Bazirgan îsal li benda du caran kêmkirina faîzê ne ku dikare kirîna zêr balkêş bike.
Kêmkirina faîzê qîmeta dolar kêm dike û bihayê kel û pel û madenan bilind dike.
