Hewlêr (Rûdaw) - Bihayê petrolê îro bi daketinê dest pê kir.
Ev yek piştî wê hat ku wezîrê karên derve yê Uman û Îranê eşkere kir ku dê vê pêncşema li Cenevreyê gera nû ya dan û standinên navbera Tehran û Washingtonê bê kirin.
Aloziyên Amerîka û Îranê
Bihayê bermîleke petrola brent a Deryaya Bakur ku ji ber zêdebûna aloziyên navbera Amerîka û Îranê hefteya borî 72 dolar derbas kiribû, îro daket nêzîkî 71 dolaran.
Her wiha bihayê petrola sivik a Teksasa Amerîkayê (WTI) ya ku 67 dolar derbas kiribû, îro bi nêzîkî 65 dolar û 76 sentan tê kirîn û firotin.
“Derfeta peymanekê heye”
Wezîrê Karên Derve yê Îranê Ebas Eraqçî ragihand ku derfeta peymanekê heye.
Wezîrê Karên Derve yê Umanê jî diyar kir, dibe ku pêncşemê di dan û standinan de bipêşketineke berbiçav çêbibe.
Li gorî pisporan, eger di dan û standinên navbera Îran û Amerîkayê de peymaneke temam pêk bê, dê bihayê petrolê kara xwe ya çend hefteyên borî bi lez ji dest bide.
