Hewlêr (Rûdaw) - Li gorî amarên Saziya Amaran a Tirkiyeyê (TUÎK), sala borî li Tirkiye û Bakurê Kurdistanê koma xwirekê ya ku herî zêde hatiye îsrafkirin fêkî û sebzeyên teze bûne.
Li gorî amarên ku ji aliyê Saziya Amaran a Tirkiyeyê (TUÎK) ve hatine parvekirin, sala borî rêjeya herî bilind a îsrafê bi ji sedî 39,7an di beşa fêkî û sebzeyên teze de hat tomarkirin, nan jî bi ji sedî 32,5an di rêza duyem de cih girt.
Encamên lêkolînê nîşan didin ku beşeke girîng a berhemên ku tên kirîn bêyî ku werin xwarin tên avêtin.
Hat diyarkirin ku sedema herî mezin a îsrafa xwirekê xerabbûna wan e.
Xwirekên ku herî zêde tên îsrafkirin
Xwirekên ku li Tirkiye û Bakurê Kurdistanê herî zêde tên îsrafkirin hatin eşkerekirin.
Li gorî amarên TUÎKê komên xwirekê yên ku herî zêde tên îsrafkirin wiha hatin rêzkirin:
· Fêkî û sebzeyên teze: Ji sedî 39,7
· Nan: Ji sedî 32,5
· Şîr û berhemên şîr: Ji sedî 15,1
· Baqliyatên hişk: Ji sedî 5,9
· Meqerne: Ji sedî 2,7
· Goşt û berhemên goşt: Ji sedî 2,7
Amaran, bi taybetî di berhemên ku temenê wan ê refê kurt e de, girîngiya plankirina xerckirinê anî rojevê.
Sedema sereke xerabbûn e
Di lêkolînê de hat vekolîn ka çima bikarhêner berhemên xwirekê davêjin çopê.
Li gorî vê yekê, hat tesbîtkirin ku ji sedî 74,4 ji ber xerabbûnê, ji sedî 12,1 ji ber derbasbûna dema bikaranînê, ji sedî 6,3 jî ji ber kirîna zêde yan jî pijandina zêde berhem nayên xwarin.
Pispor balê dikişînin ser wê yekê ku rêbazên rast ên hilanînê û kirîna plankirî di kêmkirina îsrafê de roleke krîtîk dilîzin.
Rêjeya kesên lîsteyê amade dikin
Di amarên li ser xerckirinê de plankirina kirînê jî derket pêş û li gorî amarên sala 2025an, ji sedî 54,4 bi lîsteyê derdikevin kirînê, ji sedî 14,9 li gorî bihayan tiştan dikirin û ji sedî 14,4 jî bê plan tiştan dikirin.
Hat dîtin ku rêjeya amadekirina lîsteya kirînê li malbatên ku dahata wan kêm e bilindtir e.
Xwirekên mayî didin ajelan
Di nav rêbazên ku ji bo kêmkirina îsrafa xwirekê tên tercîhkirin de, dayîna berheman a ajelan di rêzên pêşîn de cih girt.
Rêjeya kesên ku vê rêbazê bi kar tînin sala 2024an ji sedî 27,3 bû lê sala 2025an derket ji sedî 28,7an.
.webp&w=3840&q=75)