Hewlêr (Rûdaw) - Sekreterê Giştî yê Civata Bilind a Ewlehiya Neteweyî ya Îranê Muhsîn Rezayî bangî Serokê Amerîkayê Donald Trump kir got, “Teslîmî 7 şertên Tehranê bibin ku me gelek caran anîne ziman”
Muhsîn Rezayî di daxuyaniya li ser hesabê xwe yê Xê de daxuyaniya Donald Trump a li ser hevdîtinên bi Îranê re nirxand û got:
“Şerê li dijî Îranê tê meşandin, hikûmeta Amerîkayê jixwe wêran kiriye lê Washington mîna qumarbazekî bêçare çirûskan dide. Bila êdî Trump dest ji rika xwe berde.”
Rezayî bal kişand ser daxuyaniyên Trump ên ku digot hevdîtinên bi Îranê re baş diçin û hevdîtin wekî "xeyalî" û gotinên li ser wan de jî wekî "derew" bi nav kirin.
Rezayî di berdewamiya daxuyaniya xwe de got, “Dest ji redkirina nîzama nû ya li Rojavaya Asyayê berde. Dem hatiye ku tu teslîmî 7 şertên ku Îranê gelek caran danîne holê bibî.”
Serokê Amerîkayê Trump, di civîna çapemeniyê ya ku li Koşka Spî de diyar kiribû ku hevdîtinên bi Îranê re baş diçin, ew hêvî dike ku ev pêvajo di demeke nêzîk de bi dawî bibe û ew pêwistî bi operasyoneke nû ya leşkerî nabîne.
Di nav 7 şertên ku birêveberiya Tehranê ji birêveberiya Washingtonê re şandine de; rakirina ambargoya deryayî, garantîkirina derbasbûna ewle ya keştiyên bazirganî û petrolê di Tengava Hurmizê re, rakirina cezayên yekalî, muafiyeta hinardekirina neftê, serbestberdana heyinên cemidî, mayîna madeyên nukleer di hundirê welat de û bidawîkirina şer cih digirin.
.webp&w=3840&q=75)