Hewlêr (Rûdaw) - Serokkomarê Îraqê Letîf Reşîd li ser hilbijartinên Parlamentoya Îraqê peyamek belav kir û got,” Ji bo rastkirina şaşiyan yekane rê hilbijartin e.”
Sibe li Îraq û Herêma Kurdistanê hilbijartina Parlamentoya Îraqê tê kirin.
Serokkomarê Îraqê bi boneya hilbijartinan gotarek pêşkêş kir.
Letîf Reşîd di gotara xwe de ragihand ku welat ji bo çespandina aştî, seqamgîrî û bidestxistina geşepêdanê li ber qonaxeke nû û girîng e.
Serokkomarê Îraqê her wiha ev gav wekî temamkirina avakirina saziyên dewletê û pêkanîna hikûmeteke federal a bi hêz bi nav kir û teqezî li ser pêwendiyeke biîstikrar a li gel Herêma Kurdistanê kir.
"Banga beşdariya çalak"
Li Îraqê zêdetirî 29 milyon kes di temenê dengdanê de ne lê belê ji wan tenê 21 milyon kes xwedî karta bayometrî ne û dikarin dengê xwe bidin.
Serokkomarê Îraqê xwest di hilbijartinê de "beşdariyeke çalak û berfireh" pêk were.
Letîf Reşîd got, "Ji bo rastkirina şaşiyan, çareserkirina aliyên neyînî û bipêşxistina sîstema siyasî yekane rê hilbijartin e."
Letîf Reşîd ji dengderan xwest ku bi realîstî, rastgo û emanet li hilbijartina namzedên parlamentoyê binêrin.
Serokkomarê Îraqê her wiha ji bo yasayên girîng derbixe û avakirina sazûmanî ya dewletê temam bike teqezî li ser piştgirîkirina Parlamentoya Îraqê ya paşerojê jî kir.
Dengderên li Îraq û Herêma Kurdistanê dê sibe biçin ser sindoqên dengdanê û parlamenterên nû hilbijêrin.
Parlamentoya nû dê paşê li gorî demên yasayî û destûrî serokkomarê nû hilbijêre. Serokkomarê hilbijartî jî dê piştre kesekî ji bo pêkanîna hikûmetê erkdar bike.
