Hewlêr (Rûdaw) - Fermandariya Parêzvanên Sînor a Îraqê ji Rûdawê re ragihand ku ew bi nêzîkî 1000 kamera û dronan sînoran kontrol dikin û li “gelek cihên sînorê Tirkiyeyê” ew gihiştine xala sifirê.
Berdevkê Fermandariya Parêzvanên Sînor a Îraqê Heyder Kerxî îro ji Rûdawê re ragihand:
"Em bi hevahengiya Hikûmeta Herêma Kurdistanê avakirina dîwarê ji Rebîayê heta Pêşabûrê didomînin û armanca me kontrolkirina tevahiya sînorê herêmê ye.
Heta niha nêzîkî 350 kîlometreyan dîwarê betonî li ser sînorê Sûriyeyê hatiye danîn û em dêdanîna zêdetir jî bidomînin.
Navendeke nû ya çavdêriya sînoran li Bexdayê hatiye vekirin ku ji wir ve çavdêriya 975 kamerayên termal û dronên çavdêriyê tê kirin."
Wî amaje bi wê yekê jî kir ku ji bo her 22 lîwayên sînor "30 dronên çavdêriyê hatine dabînkirin û her dron dikare çavdêriya qadeke 80 kîlometreyî bike."
Heyder Kerxî derbarê “sînorê Îraqê yê bi Tirkiyeyê re” û bandora pêvajoya çareseriyê ya li ser wî sînorî anî ziman:
"Piraniya sînorê Tirkiyeyê di bin kontrola hêzên parêzvanên sînor de ye û em li gelek cihan gihiştine xala sifirê."
Wî her wiha got ku projeya wan a avakirina “100 baregehên çavdêriyê li ser sînorê Tirkiyeyê” heye û "Bi giştî niha ew sînor aram û bê pirsgirêk e."
Wî derbarê sînorê Îranê jî got, "Sînorên me yên bi Îranê re kontrolkirî û aram in û gelek birc û baregehên me yên çavdêriyê hene."
