Hewlêr (Rûdaw) - Wezareta Koç û Koçberan a Îraqê ragihand ku hefteya bê karwaneke din a Îraqiyên li Kampa Holê ya Rojavayê Kurdistanê vedigerin welatê xwe.
Berdevkê Wezareta Koç û Koçberan a Îraqê Elî Cîhangîr ji Rûdawê re eşkere kir ku destpêka kanûna pêşîn karwaneke din a Îraqiyên li Kampa Holê tên vegerandin.
Cîhangîr diyar kir ku ev karwanê 31emîn e û ji 240 malbatan pêk tê.
Kampa Holê li başûrê rojhilatê Hisîçaya Rojavayê Kurdistanê ye û di bin kontrola Hêzên Sûriyeya Demokratîk (HSD) de ye.
Beşek ji wan kesên li kampê ne Îraqî ne û malbatên çekdarên DAIŞê ne.
"3 hezar kes mane"
Elî Cîhangîr destnîşan kir ku li gorî nirxandina wezaretê, ji bilî vî karwanî 3 karwanên din ên Îraqiyan li Kampa Holê mane.
Li gorî agahiyên Berdevkê Wezaretê, hejmara wan nêzîkî 3 hezar kesî ye û ew jî dê bên vegerandin.
Wezareta Koç û Koçberan a Îraqê û Neteweyên Yekbûyî li hev kiriye ku heta sala 2027an divê ti malbateke Îraqî li wê kampê nemîne û hemû vegerin Îraqê.
Ew Îraqiyên ku ji Kampa Holê tên vegerandin, ewil ji bo rehabilitasyonê dibin Kampa Cedayê ya Mûsilê û piştre vedigerin warên xwe.
