Hewlêr (Rûdaw) - Li navçeya Geverê ya parêzgeha Colemêrgê ya Bakurê Kurdistanê derket holê ku xwendekareke 13 salî rastî destdirêjî û gefên cerdevanekî û şofêrê servîsa dibistanê hatiye.
Parlamentera Colemêrgê ya DEM Partiyê Oznur Bartinê mijar bi rêya pêşniyarpirsekê bir Parlamentoya Tirkiyeyê û hûrgiliyên vê bûyerê ji Rûdawê re eşkere kirin.
Oznur Bartinê destnîşan kir ku tevî hemû îfadeyên berfireh ên keçikê jî her du gumanbar ji aliyê dadgehê ve hatine berdan û got:
"Ji ber ku gumanbarek cerdevan e, ji aliyê dewletê ve tê parastin."
Bûyer çawa derket holê?
Li gorî agahiyên taybet ên Rûdawê, ev bûyer bi baldariya mamosteyeke dibistanê ya li Geverê derketiye holê.
Dema ku zaroka 13 salî çend rojan li pey hev naçe dibistanê, mamosteya rênîşander a dibistanê ji bo zanîna sedemê pê re diaxive.
Di wê hevdîtinê de zarok ji mamosteya xwe re dibêje ku 2 kesan destdirêjî lê kiriye.
Piştî ku mamoste bi vê rewşê dihese, bêyî ku deng jê derxîne raporekê amade dike.
Wê mamosteyê saziyên pêwendîdar û Birêvebiriya Perwerdeyê agahdar kirin û pişt re jî bangî malbatê kir.
Destdirêjî lê kirine û dîmen tomar kirine
Piştî agahdarkirinê, malbatê 20ê Çiriya Pêşîn li dozgeriyê bi awayekî fermî giliyê her du kesan kir.
Roja 21ê Çiriya Pêşîn li Navenda Çavdêriya Zarokan (ÇÎM) bi alîkariya pedagog û derûnnasan îfadeya zarokê hat wergirtin û ew xistin bin parastina dewletê.
Zarokê di îfadeya xwe de bi hûrgilî vegot ku çawa hatiye xapandin û destdirêjî lê hatiye kirin.
Li gorî îfadeyê, wan kesan di servîsa dibistanê de jî destdirêjî lê kiriye.
Her wiha hat zanîn ku piştî destdirêjiyê dîmenên wê girtine û pê gef lê xwarine:
"Eger tu dengê xwe bikî, em dê van dîmenan nîşanî malbata te bidin."
Gumanbar hatin berdan
Her du kesên ku zarokê navê wan da, cerdevan û stranbêjê dawetan N.K. û şofêrê servîsa dibistanê yê Wezareta Perwerdeyê E.O. bûn.
Her du gumanbar ji bo îfadeyê hatin gazîkirin lê tevî gotinên zelal ên zarokê jî bi hinceta "rapora bijîşkî paqij e" ji aliyê dadgehê ve hatin berdan.
Oznur Bartin li ser vê dosyeyê ji Rûdawê re axivî û wê da zanîn ku bêcezahiştina sûcdaran rê li ber tawanên nû vedike.
"Dewlet wan diparêze"
Oznur Bartinê li ser berdana gumanbaran da zanîn:
"Zarok her tiştî yek bi yek dibêje û diyar dike ku destdirêjî lê hatiye kirin.
Lê belê bi hinceta ku rapor paqij e, wan berdidin.
Yek ji gumanbaran cerdevan e û du birayên wî jî leşker in, dewlet wan diparêze.
Tevî giliyên malbatê jî ew nayên girtin.
Dema ku wan bangî wan kir wan ev tohmet red kirin lê me xwest ku qeydên telefonên wan bên lêkolînkirin."
Bartinê her wiha bal kişand ser paşxaneya şofêrê servîsê û anî zimên:
"Li gorî agahiyên me, E.O. beriya niha jî heman tawan li dijî kesekî din pêk aniye.
Bûyerên bi vî rengî her tim rû didin lê sûcdar bêceza dimînin.
Gelek bûyerên wisa hatine veşartin. Em dixwazin ev bûyer bê lêkolîn û tawanbar bên cezakirin."
Pêşniyarpirs ji bo Mahînur Ozdemîr Goktaş
Oznur Bartinê da zanîn ku wê pêşniyarpirsek daye Parlamentoya Tirkiyeyê da ku Wezîra Malbat û Xizmetên Civakî Mahînur Ozdemîr Goktaş li ser bûyerê lêpirsînê bide destpêkirin.
Bartinê di pêşniyarpirsa xwe de pirsî ka gelo gumanbar ji ber cerdevaniyê tê parastin an na.
Wê her wiha pirsî ku ji bo ewlehî û perwerdeya zarokê çi gav hatine avêtin û çima li ser gumanbaran biryara girtinê nehatiye dayîn.
