Hewlêr (Rûdaw) - Artêşa Amerîkayê di hefteya dawî de bi rêya bejahî û hewayî ji bo baregehên xwe yên leşkerî yên li Rojavayê Kurdistanê leşker û çek şandin.
Li gorî agahiyên ji çavkaniyên Sûriye û Rojavayê Kurdistanê, artêşa Amerîkayê bi balafirên kargoyê leşker û amûrên nû şandin baregehên xwe yên li parêzgeha Hesekê ya di bin kontrola Rêveberiya Xweser de.
Bi rêya hewayî leşker û dron şandin
Roja 24 û 27ê vê mehê 3 balafirên kargoyê yên leşkerî yên Amerîkayê li baregeha Rimêlanê ya Hesekê danîn.
Hat diyarkirin ku di balafira roja 24ê mehê de amûrên pêwendiyê û balafirên bêmirov (dron) hebûn.
Her du balafirên ku sê roj şûnde hatin jî, li gel 22 leşkeran amûrên teknîkî û amûrên sîstemên şopandina cografî û diyarkirina cihan ên bi rêya peykê (satelît) veguhestin.
Bi rêya bejahî jî karwaneke lojîstîk şandin
Li rexê din, di hefteya dawî de karwaneke lojîstîk a ku ji 27 wesayîtan pêk dihat, ji Deriyê Sînorî yê Welîdê yê Îraqê derbas bû û gihişte baregeha li gundê Qesrikê ku bûye yek ji baregehên sereke yên Amerîkayê li Hesekê.
Nûnerê Taybet ê Amerîkayê yê ji bo Sûriyeyê Tom Barrack di daxuyaniya xwe ya Hezîrana 2025an de wiha gotibû:
“Li Sûriyeyê baregehên me yên leşkerî kêm bûn. (Hejmara baregehên Amerîkayê) ji 8an daket, dê dakeve 5, 3 û di dawiyê de jî 1ê.”
.jpg&w=3840&q=75)
