Hewlêr (Rûdaw) - Çavkaniyeke ji Wezareta Perwerdeyê ya Sûriyeyê ji Rûdawê re ragihand ku niha li Efrîna Rojavayê Kurdistanê zimanê Kurdî tê xwendin.
Çavkaniya ku nexwest navê wê were eşkerekirin diyar ku dan û standinên wan ên li gel Desteya Perwerdeyê ya Rêveberiya Xweser rawestiyane.
Heman çavkaniyê daxuyand ku niha ti dan û standin di navbera wan Desteya Perwerdeyê ya Rêveberiya Xweser de nînin û her tişt bi rêkeftinên siyasî yên Şam û Qamişloyê vê girêdayî ye.
Her wiha destnîşan kir ku tenê rêkeftinek di navbera wan û Desteya Perwerdeyê ya Rêveberiya Xweser de hebû, ew jî li ser pêkanîna ezmûnên pola 9 û 12an li herêmên Bakur û Rojhilatê Sûriyeyê bû lê piştî wê ti lihevkirinên din çênebûne.
"Em hemû xwendekaran werdigrin”
Çavkaniyê li ser wergirtina xwendekarên ku berî niha li dibistanên Rêveberiya Xweser xwendiye û niha vedigerin dibistanên hikûmetê jî got:
"Em hemû xwendekaran werdigrin û ev mijar yasayî ye û ti peywendiya wê bi siyasetê re nîne."
Çavkaniya Rûdawê da zanîn ku rewşa xwendekarên ku vedigerin dibistanên hikûmeta Sûriyeyê tê nirxandin û xwendekar li gorî asta wan a fêrbûnê û agahiyên li ba wan tevlî polan dibin.
“Dersa zimanê Kurdî dîsa vegeriyaye”
Wê çavkaniyê li ser qedexekirina dersa zimanê Kurdî ya li Efrînê jî got:
"Piştî ketina rejîma Esed rêbazên hikûmetê li seranserê Sûriyeyê bûn yek û Efrîn jî di nav de ye lê dersa zimanê Kurdî dîsa vegeriyaye û niha li dibistanan tê xwendin."
ENKS çi dibêje?
Serokê Encumena Xwecihî ya ENKSyê ya Efrînê Ehmed Hesen ji Rûdawê re got, dersa zimanê Kurdî vegeriyaye dibistanan û niha di hefteyê de li hemû polan du ders hene.
Ehmed Hesen da zanîn ku wan xwestiye zimanê Kurdî wekî zimanekî resen be û bi awayê fermî bê naskirin.
Wî da zanîn ku Kurdî ne zimanekî biyanî ye, zimanekî resen ê pêkhateyeke resen e ku bi hezaran salan e li ser xaka xwe dijî û pêwîst e zimanê Kurdî bi biryareke fermî ya komarî di destûra Sûriyeyê de were çespandin û li herêmên Kurdan li kêleka Erebî bibe zimanekî sereke.
.jpg&w=3840&q=75)
