Hewlêr (Rûdaw) - Li navçeya Sêwregê ya Rihayê û li Colemêrgê du qezayên trafîkê çêbûn. Di encama her du qezayan de bi giştî 7 kes birîndar bûn.
Li navçeya Sêwêregê ya Rihayê li ser Bulvara Selahadînê Eyûbî ya Taxa Ayvanatê otomobîlek li traktorekê qelibî.
Di qezayê de şofêr Behtî Ertenur û kesên bi navên Aşîna Ertenur û Mîray Gelener birîndar bûn.
Her sê birîndar rakirin Nexweşxaneya Dewletê ya Sêwregê.
Li Colemêrgê jî pîkapek ji zinarekî 150 metreyî bilind ket Çemê Zapê.
Di pîkapê de 4 kes hebûn û her çar jî birîndar bûn.
Hat ragihandin ku rewşa 2 birîndaran giran e.
Li ser agahdarkirinê tîmên AFAD, UMKE, polîs, cendirme û tenduristiyê dest bi operasyoneke rizgarkirinê kirin.
Tîman bi rêya botekê xwe gihand pîkapê û 4 kesên birîndar hatin rizgarkirin.
Her çar birîndar jî bo Nexweşxaneya Dewletê ya Colemêrgê hatin şandin.
Her wiha welatiyekî ku ji bo alîkariyê xwe avêtibû avê û di avê de asê mabû jî ji aliyê tîman ve hatin rizgarkirin.
.jpg&w=3840&q=75)
