Hewlêr (Rûdaw) - Amerîkayê doh û îro sîstemên parastina asmanî û hinek çekên din şandin Rojavayê Kurdistanê.
Rewangeha Mafên Mirovan a Sûriyeyê (SOHR) ragihand ku Koalîsyona Navneteweyî ya li dijî DAIŞê (Koalîsyon) baregehên xwe yên li parêzgeha Hisîçayê (Hesekê) ya Rojavayê Kurdistanê bi çek û amûrên nû yên leşkerî bi hêz dike.
Li gorî SOHRê, balafireke barkêş a Amerîkayê li baregeha asmanî ya Xerab El-Cîrê ya li gundewarê Rimêlanê ya li bakurê Hisîçayê daniye.
Wê balafirê alîkariyên leşkerî, amûrên lojîstîk, çek û cîhazên elektronîk ên pêşketî veguhastine baregehê.
Di dema daketina balafirê de, helîkoptereke şer ji bo parastinê li ser asmanê baregehê geriyaye.
SOHRê her wiha da zanîn ku doh jî karwanekî leşkerî û lojîstîk ê Koalîsyonê ku ji 20 kamyonan pêk dihat, gihiştibû baregeha Qesrikê ya li bakurê Hisîçayê.
Di nava wî karwanî de tankerên sotemeniyê, sindoqên girtî û wesayîtên leşkerî hebûn.
Hat diyarkirin ku li gel gihiştina karwan, balafireke barkêş a Amerîkayê ya ku radar, sîstemên parastina asmanî û leşkerên Koalîsyonê tê de bûn li heman baregehê danîbû.
Di dema daketina wê balafirê de jî helîkopter li asmanê herêmê geriyane.
.jpg&w=3840&q=75)
