Hewlêr (Rûdaw) - Îlham Ehmedê, pêngaveke nû û girîng eşkera kir û ragihand ku di navbera Hêzên Sûriya Demokratîk (HSD) û hikûmeta Şamê de ji bo entegrasyonê "lihevkirineke destpêkî" heye.
Hevseroka Daîreya Pêwendiyên Derve ya Rêveberiya Xweser Îlham Ehmed îro bû mêvana Rojava TVyê û behsa dan û standinên di navbera HSD û hikûmeta Şamê de kir.
Îlham Ehmedê da zanîn ku dê demeke nêzîk bi hikûmeta Şamê re gereke nû ya dan û standinan dest pê bike.
"YPJ dê xweser be"
Îlhan Ehmedê tekez kir ku Yekîneyên Parastina Jin (YPJ) dê piştî pêvajoya entegrasyonê, di nav artêşê de xwedî statuyeke bi temamî xweser be.
Wê her wiha bal kişand ser pêwendiyên Amerîka û Sûriyeyê û got ku ev pêwendî derbasî "qonaxeke nû" bûne û temasên dîplomatîk zêde bûne.
"Pêwîstiya Sûriyeyê bi nenavendîbûnê heye"
Îlham Ehmedê projeya Rêveberiya Xweser a Rojavayê Kurdistanê wekî modelekê ji bo tevahiya Sûriyeyê pêşniyar kir û sîstemeke nenavendî wekî pêwîstiyeke bingehîn ji bo paşeroja welat bi nav kir.
Îlhan Ehmedê di dawiyê de anî ziman ku derbarê dosyeya perwerdehiyê û vegera ewle ya koçberan de jî hevdîtinên teknîkî û siyasî berdewam dikin.
.jpg&w=3840&q=75)
