Hewlêr (Rûdaw) - Birêvebirê Serbirxaneya Hewlêrê ragihand, ji ber nebûna rêkarên serjêkirina hêştiran û nebûna qesabên pispor, serjêkirina hêştiran li Hewlêrê hat qedexekirin.
Goştfiroşê bi navê Mihemed Sabîr ji Tora Medyayî ya Rûdawê re got:
"Daxwaza li ser goştê hêştiran gelekî zêde bûye, bi awayekî ku rojên înê xelk li şûna goştê sor, ajelên biçûk û mirîşkan, goştê hêştiran dikire.
Di nava 25 rojên borî de me 20 hêştir ser jê kirine ku giraniya wan 500 kîlogram û zêdetir jî bûye."
Mihemed Sabîr diyar kir ku wan rojên şemî, duşem û çarşeman li gorî rêkaran hêştir li serbirxaneyan ser jê kirine.
Birêvebirê Serbirxaneya Hewlêrê Helmet Hemze jî ji Tora Medyayî ya Rûdawê re anî ziman:
"Daxwaza li ser goştê hêştiran zêde nebûye, eger wisa bûya, xelkê em bêzar dikirin û daxwaz dikir lê tiştekî wiha nîne."
Birêvebirê Serbirxaneya Hewlêrê amaje bi wê yekê kir ku wan serjêkirina hêştiran qedexe kiriye û got:
"Ji bo serjêkirina hêştiran divê kesên pispor û sîstema nûjen hebin, ji ber ku serjêkirina wê ne wekî ya ajelên din e û zehmet e.
Divê cihê wê bêhna xwînê jê neyê û du caran stûyê wê were birîn ku ev jî karê kesên pispor e.
Loma êdî rê nayê dayîn ku li serbirxaneyên Hewlêrê hêştir werin serjêkirin û qedexe ye."
Helmet Hemze da zanîn ku rojane li serbirxaneyên wan 150-200 ser ajelên mezin tên serjêkirin ku berê yek an du hêştir dihatin serjêkirin lê niha serjêkirina hêştiran hatiye qedexekirin.
.jpg&w=3840&q=75)