Êrişî Qada Gazê ya Kormorê hat kirin

Hewlêr (Rûdaw) - Êrişî Qada Gazê ya Kormorê ya li navçeya Çemçemalê ya Silêmaniyê hat kirin.

Çavkaniyekî ewlehiyê ji Rûdawê re ragihand ku beşa LPGyê hatiye bombebarankirin û ti ziyanên canî çênebûne.

Nûçegihanê Rûdawê Herdî Mihemed diyar kir ku êriş nêzîkî demjimêr 11:30î hatiye kirin.

Karmendên Qada Gazê ya Kormorê dibêjin, heta niha “ti êrişên bi vî rengî” li qadê nehatine kirin.

Li gorî agahiyên Nûçegihanê Rûdawê Pêşewa Mihemed, ew karmendên ku li nêzîkî qadê dimînin, ji tirsa ducarebûna êrişê ji herêmê dûr ketine.

Zengila agahdariyê li qadê lê dide û agir ji qadê bilind dibe.

Hat zanîn ku çend roj berê dron li asmanê herêmê geriyane lê wê demê êrişî qadê nehatibû kirin.

Qada Gazê ya Kormorê

Qada Gazê ya Kormorê li gundê Kormorê yê nahiyeya Qadir Keremê ya navçeya Çemçemalê ya Silêmaniyê cih digire.

Qada Gazê ya Kormorê bi armanca hilberîn, bipêşvebirin û firotina berhemên petrolê sala 2007an hat avakirin û sala 2008an jî hilberîna gazê dest pê kir.

Salên 2022, 2023 û 2024an jî gelek caran êrişî Kormorê hatibû kirin.

#VÎDEO - Êrişî Qada Gazê ya Kormorê ya li Çemçemalê hat kirin

🔴 Piştî êrişê agir bi qadê ket pic.twitter.com/Fc77sB0ZHY

— RudawKurdi (@RudawKurdi) November 26, 2025