Hewlêr (Rûdaw) - Serokê Herêma Kurdistanê Nêçîrvan Barzanî, Desteya Serokatiya Encumena Niştimanî ya Kurd a Sûriyeyê (ENKS) pêşwazî kir.
Serokatiya Herêma Kurdistanê li ser civînê daxuyaniyek belav kir.
Di civînê de Desteya Serokatiya ENKSyê behsa pêşhatên dawî yên Sûriye û Rojavayê Kurdistanê û rewşa Kurd û pêkhateyên din kirin.
Her wiha behsa rola ENKSyê ya di pêvajoya siyasî û dan û standinan de hat kirin.
Nêçîrvan Barzanî teqezî li ser pêwîstiya yekrêzî û têgihiştina aliyên Kurdî kir û dubare kir ku Herêma Kurdistanê wekî her tim dê bibe piştgir û alîkarê pêvajoya dan û standinan.
Nêçîrvan Barzanî her wiha pêkvejiyan û parastina mafên hemû pêkhateyan wekî bingeha aramî û bipêşketina welêt pênase kir.
Li aliyê din, Desteya Serokatiya ENKSyê ji bo rola berdewam a Nêçîrvan Barzanî ya di çareserkirina Pirsgirêka Kurdan a li Sûriyeyê û piştgiriya berdewam a Herêma Kurdistanê spasiya xwe anî zimên.
Rewşa herêmê bi giştî û çend mijarên din ên cihê girîngiya hevbeş, mijarên din ên civînê bûn.
.jpg&w=3840&q=75)
