Hewlêr (Rûdaw) - Li bajarê Helebceyê berpirsekî bilind ê DAIŞê û du endamên din ên rêxistinê hatin girtin.
Berpirsekî Operasyonên Asayîşê ya Silêmaniyê ji Rûdawê re diyar kir ku tîmên wan ji bo girtina kesên gumanbar doh şev li taxeke navenda bajarê Helebceyê operasyonek li dar xistiye.
Li gorî agahiyên çavkaniyê, hêzên asayîşê berê îstixbarat wergirtiye ku şaneyeke girêdayî DAIŞê li wê taxê bi cih bûye.
Bi gihîştina tîman a navnîşana hedefkirî re di navbera aliyan de şer derket.
Karmendekî tîma operasyonê di wî şerî de birîndar bû.
"Berpirsê lojîstîkê yê şaneyê hat girtin"
Çavkaniyê ku nexwest navê wî were eşkerekirin, tekez kir ku di çarçoveya operasyonê de 3 endamên DAIŞê hatine girtin.
Li gorî tesbîtên destpêkê, yek ji kesên hatine girtin di nav rêxistinê de di asta 'Emîr' de kar kiriye û berpirsê lojîstîka şaneyê bûye.
Li gorî agahiyên Rûdawê, bûyer saet 20:00î li navenda Helebceyê çêbûye û kesên çekdar ên ku hatine girtin xelkê Helebceyê ne.
.jpg&w=3840&q=75)
