Hewlêr (Rûdaw) - Baregeha Barzanî, piştî karesata lehiyê ya li navçeya Çemçemalê ya parêzgeha Silêmaniyê spasiya welatî û rêxistinên civaka sivîl kir ku bi hawara mexdûran ve çûne.
Baregeha Barzanî di peyamê de tekez kir ku ruhê alîkariyê yê ku hatiye nîşandan "mînakeke bilind a piştgiriya neteweyî ye."
Baregeha Barzanî li ser karesata lehiyê ya li navçeya Çemçemalê ya Silêmaniyê û derdora wê daxuyaniyeke nivîskî belav kir.
Di peyamê de pesnê hestyariya xelk û saziyên xêrxwaziyê hat dayîn ku piştî karesatê ji çar aliyên Başûrê Kurdistanê ketine nav liv û tevgerê û alîkarî gihandine mexdûran.
"Hêjayî teqdîreke mezin e"
Di daxuyaniyê de wiha hat gotin:
"Piştî ku barana zêde li Çemçemalê û derdora wê bû sedema lehiyê rêxistinên civaka sivîl, welatî û xelkê me ji herêmên cuda yên Kurdistanê mînakeke berfireh a piştgiriyê nîşan da û bi hawara mexdûran ve çûn.
Em spasiya kesên ku destê xwe dirêjî mexdûran kiriye dikin.
Ev helwest mînakeke bilind a piştgiriya neteweyî û niştimanperwerî ya di navbera Kurdistaniyan de ye û hêjayî teqdîreke mezin e."
Baregeha Barzanî di dawiya daxuyaniyê de got, "Em ji bo welatiyên ezîz ên Kurdistanê hêviya aramî û silametiyê dixwazin."
.jpg&w=3840&q=75)
