Hewlêr (Rûdaw) - Komeke mezin ji nivîskar, rewşenbîr, hunermend û çalakvanên Kurd bi daxuyaniyeke hevpar êrişên dawî yên li ser taxên Şêx Meqsûd û Eşrefiyê yên Helebê şermezar kirin.
Di daxuyaniyê de hat tekez kirin ku ev êriş “tawaneke organîze ye” û armanca wê şikandina îradeya gelê Kurd e.
Bi dehan kesayetên naskirî, nûnerên rêxistinên civaka sivîl û siyasetmedaran îmze avêtin binê daxuyaniya piştgiriyê ya ji bo xelkê sivîl ê li taxên Kurdan ên Helebê.
“Tawaneke organîze ye”
Di daxuyaniyê de hat ragihandin ku ew “hevsoziya xwe ya tam û bê şert û merc” li gel xelkê berxweder ê Şêx Meqsûd û Eşrefiyê tînin zimên.
Îmzakeran bal kişand ser “demjimêra siyasî ya bi guman” a êrişan û diyar kir ku careke din xwîna Kurdan ji bo berjewendiyên herêmî tê rijandin.
Di beşeke daxuyaniyê de wiha hat gotin:
“Em tekez dikin ku armanckirina taxên sivîlan û tirsandina zarok û jinan bi ti hincetan nayê rewakirin.
Em vê yekê wekî kiryareke li derveyî her aqilê leşkerî dibînin.
Ev nayê qebûlkirin ku wekî ‘şaşiyeke meydanî’ were dîtin, belkî ev tawaneke organîze ya temam e û li ser wê sîcîla dirêj a siyasetên dijminane zêde dibe ku hebûna Kurdan dike armanc.”
“Kurd bi topbaranan nayên şikandin”
Rewşenbîr û çalakvanan her wiha helwesta hinek dezgehên medyayî jî şermezar kir û diyar kir ku hewldanên ji bo “spîkirina tawanê” û rewanîşandana wê hene.
Di dawiya daxuyaniyê de peyama berxwedanê hat dayîn û wiha hat gotin:
“Gelê me yê Kurd, çi li Helebê û çi li seranserê Kurdistan û Sûriyeyê, ne bi topbaranan, ne bi medyaya arastekirî û ne jî bi siyasetên tunekirinê nayê şikandin.
Berxwedana rojane ya li hemberî van tawanan, bersiva herî xurt e ji bo hemû hewldanên teslîmgirtin û şikandina îradeyê.”
Di lîsteya îmzakeran de lêkoler Heyder Omer, nivîskar û helbestvan Hoşeng Osê, helbestvan Merwan Osman, siyasetmedar Celal Menla Elî, nivîskar Îbrahîm Yûsif, Rêxistina Mafên Mirovan a Efrînê û gelek kesayetên din ên wekî hunermend, parêzer û çalakvanên mafên mirovan cih digirin.
.jpg&w=3840&q=75)
