Hewlêr (Rûdaw) - Parlamenterê DEM Partiyê yê Agiriyê Sirri Sakik bertek nîşanî êrişên Artêşa Sûriyeyê yên li ser taxên Kurdan da û got, “Îsraîl 10 kîlometreyan nêzîkî Şamê ye, kesên guleyekê jî navêjin Îsraîlê, dixwazin Kurdan qir bikin.”
Artêşa Sûriyeyê ji 6ê Kanûna Paşîn a 2026an ve bi awayekî dijwar êrişî taxên Şêx Meqsûd û Eşrefiyê yên Helebê yên Kurdan dikin.
Êrişên artêşa Sûriyeyê yên li dijî taxên Kurdan li Tirkiye û Bakurê Kurdistanê jî bûne sedema nerazîbûnan. Şeva borî li Amed, Êlih û Wanê xwenîşandan hatin lidarxistin.
Parlamenterê DEM Partiyê yê Agiriyê Sirri Sakik li ser hesabê xwe yê Xê daxuyaniyek belav kir û diyar kir ku kesên newêrin li dijî Îsraîlê derkevin dixwazin Kurdan qir bikin.
"Dixwazin Kurdan qir bikin"
Sirri Sakik bal kişand ser rewşa taxên Kurdan ên Helebê û got:
“Hinek kes bi salan e bi gotinên 'Em Kurdan tune bikin' ev welat û xwe westandine.
Niha cîhadî, DAIŞ û Artêşa Azad a Sûriyeyê du taxên Kurdan ên dorpêçkirî yên li Helebê bi çekên giran bombebaran dikin, tevî jin û zarokan xelkê dikujin.
Îsraîl 10 kîlometreyan nêzîkî Şamê ye, kesên guleyekê jî navêjin Îsraîlê, dixwazin Kurdên ku xwe spartine du taxan, qir bikin.”
"Ev rê şer û xwînê zêdetir dike"
Sirri Sakik di dawiya peyama xwe de hişyarî da û anî zimên:
“Ev rê şer, xwîn û rondikan zêdetir dike. Ji bilî aştiyê çi bijarde dibe bila bibe, dê hemû gelan ber bi dojehê ve bikişîne.”
.jpg&w=3840&q=75)
