Hewlêr (Rûdaw) - Hevseroka Daîreya Têkiliyên Derve ya Rêveberiya Xweser Îlham Ehmedê ragihand ku nûçeyên derbarê "komkujiyên li Hisîçayê" de nerast in û armanca wan têkdana agirbestê ye.
Îlham Ehmedê li ser rewşa dawî daxuyaniyek da û bang li welatiyan kir ku baldar bin.
"Nûçe sexte ne"
Îlham Ehmedê diyar kir ku ew nûçe ji aliyê aliyên têkder ve tên belavkirin û got:
"Em bangî welatiyan dikin ku di asta herî bilind de baldar bin.
Hemû nûçeyên derbarê 'komkujiyên li Hisîçayê' de bi temamî sexte û çêkirî ne."
"Armanc têkdana agirbestê ye"
Hevseroka Daîreya Têkiliyên Derve destnîşan kir ku armanca van nûçeyan ew e ku rê li ber bicihanîna agirbestê bigirin û wiha pê de çû:
"Ev nûçe ji aliyê çavkaniyên girêdayî aliyên têkder ve tên belavkirin.
Armanc ew e ku nehêlin agirbest pêk were, nakokiyên eşîrî werin gurkirin û êrişên li ser Hisîça û Kobaniyê cardin dest pê bikin."
"Em pabendî yekbûnê ne"
Îlham Ehmedê di dawiya daxuyaniya xwe de tekezî li ser rêkeftina dawî ya di navbera HSD û Hikûmeta Sûriyeyê de kir û got:
"Em bi rêkeftina agirbestê û yekbûna temam ve girêdayî ne."
.jpg&w=3840&q=75)
