Hewlêr (Rûdaw) - Nûnerê Amerîkayê yê Kar û Barên Îraqê Mark Savaya derbarê rewşa Îraqê de daxuyaniyek da û tekez kir ku pirsgirêka sereke ya Îraqê gendelî ye.
Savaya di daxuyaniya xwe de diyar kir ku eger armanc sererastkirina Îraqê be, divê pêşî bi biryardarî rûbirûyî gendeliyê bibin û got, "Mîlîs nîşane ne, gendelî nexweşî ye."
“Tora gendeliyê çawa kar dike?”
Mark Savaya eşkere kir ku ew bi hûrgilî dizane bê ka pereyên qirêj çawa tên veguhastin û diyar kir ku ev pere ne tenê di destê berpirsên payebilind re derbas dibin.
Savaya li ser mekanîzmaya vê torê wiha got:
“Ya girîngtir ew e ku ev pere di nav qatên aktorên asta nizm ên wekî endamên malbatê, heval, parêzvan, şofêr û navbeynkaran re derbas dibin.
Ev pêkhate, sîstemê bi awayekî çalak dihêle û di heman demê de parastin û derfeta înkarkirinê diafirîne.”
“Mîlîsên Îranê bi vê sîstemê xurt bûn”
Nûnerê Amerîkayê bal kişand ser wê yekê ku ev tor zêdetirî du dehsalan e çalak e û wekî toreke “gelekî aloz û bi zanebûn hatiye avakirin” bi nav kir.
Savaya destnîşan kir ku vê sîstemê rêzikname, çarçoveyên lihevhatinê û mekanîzmayên çavdêriya navneteweyî derbas kirine û wiha pê de çû:
“Bi rêya vê sîstemê, komên mîlîs ên ku Îran piştgiriya wan dike ji aliyê darayî ve hatine bihêzkirin, parastin û li ser pêyan girtin.”
“Divê çavkaniyên diravî werin ziwakirin”
Mark Savaya diyar kir ku her hewldana cidî ya ji bo aramkirina Îraqê, vegerandina serweriyê û hilweşandina mîlîsan divê bi hilweşandina wan torên gendeliyê dest pê bike ku wan fînanse dikin û diparêzin.
Savaya di dawiya daxuyaniya xwe de hişyarî da û got:
“Divê çavkaniyên wan pereyên mezin ên gendeliyê yên wekî mûçeyên sexte, deynên sexte û hebûnên xeyalî werin rawestandin.
Bêyî vê yekê, dê hemû hewlên din têk biçin.”
.jpg&w=3840&q=75)
