Hewlêr (Rûdaw) - Îsraîlî ji bo hilbijartinan diçin ser sindoqên dengdanê.
Gelek kes vê hilbijartinê wekî yek ji hilbijartinên herî çarenivîsî yên di dîroka wî welatî de dibînin.
Piştî êrişên 7ê Çiriya Pêşîn a 2023yan ên Hemasê yên li ser Îsraîlê, ev yekem hilbijartin e.
Her wiha ev piştî şer û pevçûnên li Xezeyê, Libnan, Îran, Sûriye û Yemenê jî hilbijartina yekem e.
Pêşbaziyeke dijwar ji bo serokwezîrtiyê
Rapirsiyên ku roja înê hatin belavkirin nîşan didin ku hevrikî ji bo posta serokwezîrtiyê gelekî dijwar e.
Ev hevrikî bi giranî di navbera Serokwezîrê niha yê Îsraîlê Benjamin Netanyahu û Sererkanê berê yê Artêşa Îsraîlê Gadi Eisenkot de derbas dibe.
Yek ji sedemên piştgiriya Eisenkot a ji aliyê dengderan ve paşxaneya wî ya leşkerî ye.
Lê cihê wî yê wekî kesayetiyekî ku di siyasetê de nû ye jî di vê yekê de xwedî rol e.
Wî partiya “Yashar”ê sala borî damezirand.
Ev yek bûye sedem ku beşek ji dengderan wî wekî alternatîfeke cuda ji siyasetmedarên kevneşopî bibînin.
Dabeşbûna di nav mixalefetê de
Serokên din ên mixalefetê Serokwezîrê berê Naftali Bennett û Avigdor Lieberman in.
Her du jî kesayetiyên rastgir in û li ser ewlehiyê helwestên wan ên tund hene.
Ew piştgiriyê didin kontrola daîmî ya Îsraîlê ya li ser beşeke mezin a Şerîeya Rojava.
Siyasetmedarê çepgir Yair Golan jî piştgiriyê dide vekişîna Îsraîlê ya ji beşên berfireh ên wê axê.
Tevî nakokiyên xwe jî ew dikarin ji bo avakirina hikûmetê bi Eisenkot re hevkariyê bikin.
Hikûmeta niha ya Netanyahu di dîroka Îsraîlê de hikûmeta herî rastgir e.
Ji bo ku di desthilatê de bimîne, ew dê mecbûr bimîne ku pişta xwe bi piştgiriya hinek hevpeymanên xwe yên niha yên di hevbendiya rastgiriya tundrew de girê bide.
.webp&w=3840&q=75)