Hewlêr (Rûdaw) - Li bajarê Toledoyê yê eyaleta Ohioyê ya Amerîkayê, li festîvalekê gule hatin reşandin.
Di bûyerê de herî kêm 12 kes birîndar bûn û Polîsan ragihand ku heta niha ti gumanbar nehatine desteserkirin.
Di dema lidarxistina Festîvala Old West Endê ya li bajarê Toledoyê de di navbera 2 kesan de pevçûna bi çekan derket.
Cîgirê Birêvebirê Polîsê bajêr Joseph Heffernan ji medyayê re ragihand, "12 kes birîndar bûne û rewşa tenduristiyê ya duyan ji wan ne aram e."
Joseph Heffernan da zanîn ku êrişkaran gule li hev reşandine û ji ber vê yekê gule li xelkê derdorê ketine û ew birîndar bûne.
Efserê polîs Dan Gerken jî li ser nasnameya qurbaniyan diyar kir ku emrê piraniya wan di derdora 20 salî de ye û got:
"Birîndarbûna 12 kesan di heman demê de û di bûyereke tenê de karesat e."
Niha hêzên ewlehiyê herêm dorpêç kiriye.
Polîs vîdeoyên kamerayên çavdêriyê û telefonên şahidên bûyerê kontrol dike ku nasnameyên êrişkaran eşkere bike û wan desteser bike.
Festîvala Old West Endê çalakiyeke salane ye ku ji bo muzîk û çandê li herêmên dîrokî yên bajarê Toledoyê tê lidarxistin.
Polîsan diyar kir ku tevî hebûna hêzên ewlehiyê yên zêde li cihê bûyerê, wan nekariye rê li ber vê pevçûnê bigirin.
.webp&w=3840&q=75)