Dusseldorf (Rûdaw) - Heryad Haşim ê 17 salî, tevî ku bê dê û bav mezin bûye, bi hewldanên xwe û piştgiriya birayên xwe karîbû bibe werzişvanekî serkeftî.
Çîroka Heryad û birayên wî mînakeke berbiçav a yekîtî û têkoşînê ye.
Hêmin Ebdulah di bernameya xwe de mazûvaniya Heryad û birayê wî Soran kir.
Hêmin Ebdulah teqez kir ku lehengên rastîn ên vê çîrokê, ji bilî Heryadê boksor, birayên wî Soran û Yeqûb in.
Heryad di temenekî biçûk de dê û bavê xwe ji dest daye lê birayên wî pişta wî girtiye û ew perwerde kirine heta ku van demên dawî li Almanyayê xelatek wergirtiye.
Destpêka çîrokê: Rikberê bi navê Hîtler
Heryad bi ken behsa yekemîn lîstika xwe ya li Almanyayê kir û got ku navê rikberê wî Hîtler bû.
Heryad got, "Mamosteyê min ji min re got, 'Dest pê bike û pozê wî bişkîne! Lêxe!' Lê min lê nexist."
Soran Haşim, birayê Heryad, da zanîn ku Heryad van demên dawî di boksê de li bajarê Karlsruhe yê Almanyayayê pileya duyem bi dest xistiye.
Heryad li klûba xwe ya kickboxingê ya li Ravensburgê di bin çavdêriya rahênerê xwe Ayhan Andrea de rahênanê dike. Birayê wî yê mezin Yeqûb jî rahênerê wî yê malê ye.
Sira serkeftinê: Yekîtiya birayan
Soran eşkere kir ku dema dêya wan wefat kiriye, Heryad heft salî bûye. Wê demê Soran, Yeqûb û Eyûbê birayê wan, mal wisa xemilandibûn ku Heryad karibûya lîstika boksê bilîze.
Hêmin Ebdulah pirsî ka wan çawa karîbû Heryad perwerde bikin û bikin lehengek.
Soranê birayê mezin ê Heryad bersiv da û got, "Em yekgirtî ne û em ji dêya xwe fêrî wê yekgirtinê bûn.
Dema dêya me wefat kir, em bi tenê li Almanyayê man. Xelkê digot, 'Êdî xilas e, ev zarok dê bikevin ser cadeyan.'
Me destê hev girt û me biryar da ku eger em piştgiriya hev nekin, ti çareya me namîne. Yanî, yekîtiya me sira serkeftina me ye."
"Sira serkeftina min kebaba Kurdî ye"
Heryad bi ken behsa xwarinên Kurdî kir û got, "Birayên min her tim ji min re dibêjin, 'Tu gelek kebabê dixwî, kebab û kufte.’ Kebaba Kurdî yekem e, sira serkeftina min kebaba Kurdî ye."
Heryad derbarê amadehiyên xwe de jî got, "Hefteyek beriya pêşbirkê min nanê zêde nedixwar, tenê xwarinên sivik. Her wiha min gelek rahênan dikir."
"Ez şerm nakim ku Kurd im"
Heryad li ser hesta Kurdbûnê û ala Kurdistanê di dema lîstikên xwe de wiha got:
"Yek heye ku bi alaya Kurdistanê li Almanyayê dilîze, ew tişt li ber çavê min xweş e. Ango şerm nake ku Kurd e.
Ez jî wekî wî me, ez jî şerm nakim ku Kurd im. Ez nîşanî xelkê derve didim ku ez kî me û xelkê kîjan welatî me."
