Hewlêr (Rûdaw) - Donald Trump û Şahzadeyê Erebistana Siûdî Mihemed Bin Selman dê di serdana hefteya bê ya Washingtonê de rêkeftineke ewlehiyê îmze bikin.
Di çarçoveya rêkeftinê de tê payîn ku girêbesta kirîna balafirên şer ên F-35an ji aliyê Erebistana Siûdî ve were îmzekirin.
Li gorî medyaya Amerîkayê, biryar e roja sêşema bê Serokê Amerîkayê Donald Trump li Koşka Spî Şahzadeyê Erebistana Siûdî Mihemed Bin Selman pêşwazê bike û di hevdîtina xwe de rêkeftineke berfireh a ewlehî û aboriyê îmze bikin.
Yek ji xalên sereke yên rêkeftinê, firotina balafirên şer ên bipêşketî yên F-35an ên Amerîkayê ya Erebistana Siûdî ye.
Berpirsekî birêvebiriya Trump ragihand ku Washington û Riyad li ser kirîna gaza xwezayî ya Erebistana Siûdî jî gotûbêjan dikin.
Berpirsên Amerîkayî yên ku ji gotûbêjan agahdar in, diyar kir ku Erebistana Siûdî hewl dide balafirên F-35an bi dest bixe ku ji aliyê kompanyaya Lockheed Martinê ve tên çêkirin.
Ev balafirên şer wekî yek ji balafirên herî bipêşketî yên cîhanê tên naskirin û her yekê wan nêzîkî bi 100 milyon dolarî tên texmînkirin.
Ev rêkeftina ewlehiyê ya biha di demekê de ye ku Washington û Riyad ji bo berfirehkirina hevkariya xwe ya stratejîk dixebitin û Trump ji Erebistana Siûdî xwestiye ku beşdarî Peymana Abrahamê bibe û pêwendiyên xwe bi Îsraîlê re asayî bike.
Amerîka û Îsraîl hinekî dilgiran in
Hewldanên Amerîkayê ji bo razîkirina Erebistana Siûdî ya ji bo asayîkirina pêwendiyên bi Îsraîlê re didomin û yek ji mijarên din ên lûtkeya Koşka Spî dê beşdariya Erebistana Siûdî ya di Peymana Abrahamê û avakirina Xezeyê de be.
Hinek dilgiraniyên Amerîka û Îsraîlê yên derbarê hebûna F-35an a Erebistana Siûdî hene.
Îsraîlê pêşniyar kiriye ku ji bo parastina ewlehiya herêmê, girîng e ku Amerîka û Îsraîl bi tenê xwediyê van balafiran bin.
Her wiha medyaya Amerîkayê belav kiriye ku berpirsên leşkerî yên Amerîkayê ditirsin ku di encama firotina balafiran a Erebistana Siûdî de Çîn bigihêje teknolojiyên bipêşketî û hestyar ên Amerîkayê.
Pêywendiyeke nêzîk û kûr di navbera Donald Trump û Mihemed Bin Selman de heye.
Trump di serdana xwe ya meha Gulanê ya Erebistana Siûdî de derbarê Mihemed Bin Selman gotibû, "Ez gelekî jê hez dikim û ji hevaltiya wî hez dikim."
