Hewlêr (Rûdaw) - Dewletên Yekbûyî yên Amerîkayê (DYA) heta niha çend serokên welatan desteser kirine û ew darizandine.
Yek ji wan ê herî navdar Sedam Husên bû ku Kanûna Pêşîn a 2003yan hate girtin û paşê li Îraqê hate darizandin û hat îdamkirin.
Yê herî dawî jî Serokê Venezuelayê Nicolas Maduro ye ku di operasyoneke hêzên taybet de hate girtin û ew birin Amerîkayê. Biryar e ku ew li wir were darizandin.
Serokên ku Amerîkayê ew girtine:
Serokê Panamayê Manuel Noriega
Sala 1989an di dema dagirkirina Panamayê ya ji aliyê Amerîkayê ve hate girtin.
Manuel Noriega bi bazirganiya narkotîk, spîkirina pereyan û wergirtina bacê 40 sal cezayê girtîgehê lê hate birîn û 21 salan di girtîgehê de ma.
Sedam Husên
Sala 2003yan piştî rizgarkirina Îraqê ji destê rejima Beasê hate girtin.
Amerîkayê ew nedarizand û radestî desthilatdarên Îraqê kir. Wan jî cezayê îdamê lê birî û 30yê Kanûna Pêşîn a 2006an hat îdamkirin.
Serokê Hondurasê Juan Orlando Hernandez
Desthilatdarên welatê wî sala 2022yan ew girtin û radestî Amerîkayê kirin. Washingtonê ew bi tohmeta plana qaçaxçitiya kokaînê ya ji bo Amerîkayê û dan û standina bi komên krîmînal re tawanbar kir.
Dadgeheke federal sala 2024an 45 sal cezayê girtîgehê lê birî lê Trump Kanûna Pêşîn a 2025an efûya wî derxist.
Serokê Venezuelayê Nicolas Maduro
Trump 3yê Kanûna Paşîn a 2026an girtina wî eşkere kir. Maduro di operasyoneke hêzên taybet ên Amerîkayê de hate girtin.
Amerîkayê ew û hikûmeta wî wekî "rêxistineke terorê ya biyanî" pênase kir. Donald Trump eşkere kir ku Maduro û hevjîna xwe dê li Amerîkayê bên darizandin.
