Hewlêr (Rûdaw) – Îro 1ê Çiriya Paşîn salvegera 11emîn a Roja Cîhanî ya Kobaniyê ye.
Rojek ku di bîra cîhanê de wekî sembola berxwedana li dijî hovîtiyê û piştgiriya navneteweyî ya ji bo têkoşîna azadiyê cih girtiye.
Di vê roja dîrokî de, Fermandarê Giştî yê Hêzên Sûriyeya Demokratîk (HSD) Mezlûm Ebdî bi peyamekê li ser hesabê xwe yê tora civakî ya Xê hemû şehîdên berxwedana Kobaniyê û kesên ku piştgirî dan vê têkoşînê bi bîr anîn.
Berî 11 salan, 1ê Çiriya Paşîn a 2014an bi milyonan Kurd û dostên li seranserî cîhanê ji bo piştgiriya berxwedana dîrokî ya Kobaniyê ya li dijî êrişên hovane yên DAIŞê daketin qadan.
Wê demê, Kobanî di bin dorpêçeke giran de bû lê şervanên Kurd ên YPG û YPJyê û Pêşmergeyan bi çekên sivik li hemberî çekên giran ên DAIŞê bi awayekî bêhempa li ber xwe da.
Ev berxwedan bû sedem ku wîjdanê cîhanê rabe ser pêyan û piştgiriyeke mezin a navneteweyî ji bo Kobaniyê were avakirin.
Fermandarê Giştî yê HSDyê Mezlûm Ebdî di peyama xwe de anî ziman:
"Di Roja Cîhanî ya Piştgiriya Berxwedana Kobaniyê ya li dijî rêxistina terorîst a DAIŞê de, em fedakariyên mezin ên ku şervan û gelê me ji bo parastina bajarê xwe û mirovahiyê bi giştî kirine, bi bîr tînin.
Her wiha em piştgiriya cîhanî û piştgiriya Hevpeymaniya Navneteweyî ya ji bo hêzên me di wî şerî de û her kesên ku di wan rojên dijwar de li kêleka me sekinîn, wekî sembola yekîtiya mirovahiyê ya li hemberî tarîtî û tundiyê, bi bîr tînin.
Wê piştgiriyê hêz da me ku em rêxistinê li bajarê xwe têk bibin û ber bi bidawîanîna xîlafeta wê ya qaşo û avakirina paşerojeke baştir ji bo hemû Sûriyeyiyan ve gavan bavêjin."
Berxwedana Kobaniyê di têkoşîna li dijî DAIŞê de bû werçerxaneke stratejîk.
Piştî banga cîhanî ya 1ê Çiriya Paşîn, Koalîsyona Navneteweyî ya bi pêşengiya Amerîkayê piştgiriya xwe ya asmanî zêde kir û ji Başûrê Kurdistanê jî Pêşmerge bi çekên giran di ser Bakurê Kurdistanê re derbasî Kobaniyê bûn.
Ev yekîtiya neteweyî û piştgiriya navneteweyî bû sedem ku efsaneya "têkneçûna DAIŞê" têk biçe û Kobanî piştî 134 rojan 26ê Kanûna Paşîn a 2015an bi temamî ji DAIŞê hat rizgarkirin.
Ji wê rojê ve, Kobanî wekî "Stalîngrada Kurdan" û sembola serkeftina vîna azadiyê li hemberî terorê tê naskirin.
في اليوم العالمي للتضامن مع مقاومة كوباني ضد تنظيم داعش الإرهابي، نستذكر التضحيات الجسيمة التي قدّمها مقاتلونا وشعبنا دفاعاً عن مدينتهم والإنسانية جمعاء.
— Mazloum Abdî مظلوم عبدي (@MazloumAbdi) November 1, 2025
نستحضر أيضاً التضامن العالمي ودعم التحالف الدولي لقواتنا في تلك المعركة، وكل من وقف معنا في تلك الأيام العصيبة، رمزًا لوحدة… pic.twitter.com/JfpREHHvvu
.jpg&w=3840&q=75)
