Hewlêr (Rûdaw) - Siyasetmedarê navdar ê Herêma Kurdistanê Mela Bextiyar xwe ji bo posta Serokkomariya Îraqê namzed kir.
Ofîsa Mela Bextiyar diyar dike ku ew li dijî namzedên PDK û YNKyê dernakevin û dixwazin bibin beşek ji çareseriyê.
5ê Kanûna Paşîn a 2026an, Ofîsa taybet a Mela Bextiyar ji Rûdawê re got,"Îro Birêz Mela Bextiyar bi awayekî fermî ji bo posta Serokkomariya Îraqê xwe namzed kir."
Ofîsa Mela Bextiyar her wiha da zanîn ku Mela Bextiyar wekî kesekî serbixwe xwe namzed kiriye lê hîn jî xwe wekî endamê Yekîtiya Niştimanî ya Kurdistanê (YNK) dibîne.
Di daxuyaniyê de hat gotin,"Ew naxwaze li dijî namzedê YNKyê yan jî namzedê PDKyê derkeve.
Armanca wî ew e ku eger PDK û YNK li ser namzedekî li hev nekin, ew bibe sedema lihevkirina wan û bibe namzedê hevbeş ê Kurdan."
Derbarê dan û standinên bi aliyên Kurdistanî û Îraqî re, ofîsa wî eşkere kir ku wan bi hemû aliyan re dan û standin kiriye û wan soz daye ku piştgiriyê bidin wî.
Hinek agahî derbarê Hikmet Mihemed Kerîm (Mela Bextiyar) wisa ne:
- 20ê Tebaxa 1954an li Xaneqînê ji dayîk bûye.
- 10ê Hezîrana 1970yî tevlî Komeleya (Marksîst-Lenînîst) bûye.
- Sala 1974an tevlî Şoreşa Îlonê bûye.
- Sala 1975an bi fermana serkirdayetiya Komeleyê vegeriyaye bajarê Xaneqînê.
- Yek ji wan kesên ku navê wî di lîsteya kesên lêgerînê yên hikûmeta Îraqê de bû.
- Sala 1975an bûye endamê serkirdayetiya Komeleya Rencderên Kurdistanê.
- Sala 1976an bûye Endamê Serkirdayetiya YNKyê.
- Sala 1978an bûye berpirsê herêma Helebceyê.
- Sala 1982yan bûye berpirsê Melbendê Rêkxistina Silêmaniyê yê YNKyê.
- Sala 1984an endamê tîma dan û standinan a Kurdan a bi hikûmeta wê demê ya Îraqê re bûye.
- Sala 1991ê di Raperînê de xwedî rol bûye.
- Sala 1992yan beşdarî kongreya aliyên mixalefetê yên Îraqê ya li Viyanayê bûye.
- Sala 1993yan bûye Berpirsê Mekteba Rêxistinên Demokratîk a YNKyê.
- Sala 1995an bûye Serokê Komîteya Olîmpiyadê ya Kurdistanê.
- Sala 1995an bûye Parlamenterê Parlamentoya Kurdistanê.
- Sala 2001ê bûye Endamê Mekteba Siyasî ya YNKyê.
- Sala 2009an bûye Endamê Desteya Karbirêker a Mekteba Siyasî ya YNKyê.
- Sala 2010an bûye Berpirsê Desteya Karbirêkera Mekteba Siyasî ya YNKyê.
- Ji xeynî karê siyasî, nivîskarê gelek pirtûkan e.
.jpg&w=3840&q=75)