Hewlêr (Rûdaw) - Nêçîrvan Barzanî û şandeya Fransayê teqezî li ser berdewamiya hevkariya hevbeş kir.
Serokê Herêma Kurdistanê Nêçîrvan Barzanî Nûnerê Bilind ê Fransayê yê di Hevpeymaniya Navneteweyî de General François Tricot û şandeya pê re pêşwazî kir.
Serokatiya Herêma Kurdistanê di daxuyaniyekê de ragihand ku di hevdîtinê de pêwendiyên Fransa yên bi Îraq û Herêma Kurdistanê re, rewşa Îraq û Herêma Kurdistanê, metirsiya terorê, gefên DAIŞê û çalakiyên Hevpeymaniya Navneteweyî yên li Îraqê hatin gotûbêjkirin.
Li gorî daxuyaniyê, her du aliyan teqezî li ser girîngiya berdewamiya alîkarî û hevahengiya hevbeş a navbera Fransa, Îraq û Herêma Kurdistanê kir ku di çarçoveya Hevpeymaniya Navneteweyî de ji bo rûbirûbûna terorê û parastina aramî û seqamgîriya herêmê tê kirin.
Serokatiya Herêma Kurdistanê diyar kir ku Nêçîrvan Barzanî spasiya Fransayê kiriye û gotiye:
"Nêçîrvan Barzanî spas û pêzanînên Herêma Kurdistanê ji bo piştgiriya berdewam a Fransayê ya li Îraq û Herêma Kurdistanê anî zimên.
Şandeya mêvan jî pabendbûna welatê xwe ya ji bo berdewamiya piştgirîkirina Herêma Kurdistanê û Hêza Pêşmergeyan nîşan da."
Rewşa Sûriyeyê û navçeyê bi giştî û çend mijarên din ên cihê girîngiya hevbeş, mijarên din ên hevdîtinê bûn ku Konsulê Giştî yê Fransayê yê li Herêma Kurdistanê Yann Braem jî tê de amade bû.
.jpg&w=3840&q=75)