Hewlêr (Rûdaw) - Cangul Şenogluya 33 salî ya ku ji navçeya Hesen Bedrikê (Yazihan) ya Meletiya Bakurê Kurdistanê ye, bi 2 beran û 37 mihan dest bi ajeldariyê kir.
Cangul Şenogluyê di nav 3 salan de hejmara pezê xwe gihand 250 serî û niha li gel bavê xwe şivantiya kerî dike.
Ajeldar Cangul Şenogluyê anî ziman:
“Niha keriyê pezê min nêzîkî 250 serî ye.
Ez her sal keriyê xwe mezintir dikim.
Em havînan wan didoşin û penîrê wan difiroşin.
Carinan bavê min û carinan jî ez kerî diçêrînim.”
Di erdhejên 6ê Sibata 2023yan de hem axur û hem jî mala wan bi temamî hilweşiyan.
Lê vê yekê Cangul ji karê wê dûr nexist û ji wê demê ve di konan de ajelên xwe xwedî dike.
Cangul Şenogluyê her wiha da zanîn:
“Ajelên me hîn jî di wan konên ku Birêvebiriya Çandinî û Daristanan dane me de dimînin.
Em bi xwe jî di konteynerê de dimînin.
Eger axurek bê çêkirin û cihekî ku em karibin lê bimînin hebe, helbet em dê karibin ajelên xwe baştir xwedî bikin.”
Cangul Şenogluya ku bi xwe endezyara xwirekê ye dibêje ku dahateke baş a vî karî heye û pêşniyar li hemû jinên navçeyê dike ku ew jî dest bi xwedîkirina pez bikin.
Armanca wê ew e ku çewlîkeke modern ava bike û di nav 5 salan de hejmara keriyê xwe bigihîne hezar serî.
.jpg&w=3840&q=75)
