Hewlêr (Rûdaw) - Pêşkêşkarê navdar ê Rûdawê Renc Sengawî di bernameya "Ligel Renc" de ji bo mexdûrên lehiyê yên li Germiyan, Silêmanî û Kerkûkê kempeyneke mezin a alîkariyê da destpêkirin.
Di weşana zindî de bi piştgiriya karsaz û hunermendan bi giştî 5 milyar û 887 milyon û 870 hezar dînar (nêzîkî 4 milyon û 205 hezar û 621 dolar) hatin komkirin.
Renc Sengawî ji bo pêçana birînên karesata lehiyê bi cilên reş derket pêşberî kamerayan û karsaz û hunermendên navdar ên Herêma Kurdistanê di studyoyê de kirin mêvan.
Di bernameyê de demên hestyarî çêbûn û ruhê hevgirtinê û bexşên rekor mohra xwe li şevê xistin.
Piştgiriya mezin a karsazan
Yek ji bexşên herî mezin ên şevê ji karsazê navdar Farûq Mela Mistefa hat.
Mistefa 1,2 milyar dînar (nêzîkî 857 hezar dolar) bexşand û bi gotina "Berîka kefen tune" ye bangî karsazên din kir.
Farûq Mela Mistefa lehiya sala 1957an a Silêmaniyê bi bîr anî û tekez kir ku karesata li Çemçemalê gelekî biêştir e.
CEOyê Koma Şirketên Qeywanê Şêx Faxîr Şêx Teyîb jî milyarek dînar (nêzîkî 714 hezar dolar) bexşand û piştgiriyeke mezin da kampanyayê.
Şêx Faxîr bi gotinên "Em ne ji veşartina pereyan a li qaseyê, ji bexşandina wan kêfxweş dibin" bal kişand û teqdîra hemûyan kom kir.
Hunermend bê deng neman
Hunermendê navdar ê Kurd Zekeriya Ebdulla li hemberî banga Renc Sengawî bê deng nema û 100 milyon dînar (nêzîkî 71 hezar dolar) bexşand.
Hunermendê ciwan Agrîn Dilşad jî bi 250 milyon dînarî (nêzîkî 178 hezar dolar) beşdarî kampanyayê bû û mînakeke mezin a comertiyê nîşan da.
Lehengên nediyar
Di kampanyayê de xêrxwazekî ku nexwest navê wî were eşkerekirin 250 milyon dînar bexşand û welatiyekî jî bi niyeta ku ji bo bavê wî yê nexweş dua bê kirin 10 milyon dînar şand.
Her wiha Şirketa IQ, Mistefa Xalid Xoşnaw û Koma Şirketên Yaqûb jî gelek sazî û kesayetên din her yekî 100 milyon dînar bexşandin.
Alîkarî di destên ewle de ne
Tora Medyayî ya Rûdawê ji bo ku alîkarî bi awayekî şefaf bigihêjin mexdûran komîsyoneke taybet ava kir.
Ev pêvajo dê di bin çavdêriya Seroka Komîsyona Serbixwe ya Mafên Mirovan a Herêma Kurdistanê Muna Yaqû û Serokê Komîsyona Destpakiyê Hakim Ehmed de were birêvebirin da ku alîkarî bigihin destê kesên pêwîst.
.jpg&w=3840&q=75)