Hewlêr (Rûdaw) - Hevseroka Daîreya Têkîliyên Derve ya Rêveberiya Xweser Îlham Ehmed ragihand, heta ku pirsgirêka Kurdan û pirsgirêka jinê bi awayekî bingehîn neyên çareserkirin, li Rojhilata Navîn û Sûriyeyê aştiyeke mayînde pêk nayê.
Îlham Ehmed beşdarî Foruma Aştî û Ewlehiyê ya Rojhilata Navîn bû ku li Zanîngeha Amerîkî ya Kurdistanê ya li Dihokê hat lidarxistin.
Îlham Ehmedê di destpêka axaftina xwe de spasiya Serokwezîrê Herêma Kurdistanê Mesrûr Barzanî û Zanîngeha Amerîkî ya Kurdistanê kir û bal kişand ser sedemên bingehîn ên şer û aloziyan.
“Du pirsgirêkên bingehîn hene”
Îlhamê diyar kir ku ji bo aştiyê du pirsgirêkên bingehîn hene û got:
“Yek jê pirsgirêka neteweyan e, di serî de pirsgirêka Kurdan ku bi dehên salan e mafên wî hatine binpêkirin û înkarkirin.
Ya din jî pirsgirêka jinê ye, ku ew jî yek ji sedemên sereke ye ku di nava malbat, civak û dewletê de aştî çênebe.”
Wê amaje bi wê yekê kir ku sîstema navendî ya ku li ser bingeha “yek ziman û yek reng” hatiye avakirin, hemû çand û pêkhateyên din diçewisîne û ev yek bi xwe sedema şer e.
“Divê destûreke nû hebe û jin beşdar bibin”
Wê li ser gavên çareseriyê got ku divê destûreke nû ya bingehîn û demokratîk bê amadekirin ku mafên hemû pêkhateyan misoger bike.
Wê her wiha bal kişand ser girîngiya hevparî û parvekirina desthilatê û got:
“Divê birêvebiriya Sûriyeyê li ser bingeha hevbeşiyê be ne ku tenê ji navendekê biryar bên dayîn.”
Hevseroka Daîreya Têkîliyên Derve di dawiya axaftina xwe de bal kişand ser rola jinê û got:
“Aştiyeke ku jin tê de nebe, nabe aştiyeke mayînde. Divê jin di hemû navendên biryarê de cih bigirin û ev yek ne tenê bi awayekî sembolîk be.”
.jpg&w=3840&q=75)
