Hewlêr (Rûdaw) – Ciwanekî ji devera Biradostê ya parêzgeha Hewlêrê 4 meh in winda ye.
Malbata wî dibêje ku ew bi soza “pasaport û jineke Rûsî” hatiye xapandin û niha li Rûsyayê li dijî Ukraynayê şer dike.
Siyamend Wehabê birayê Metîn Wehabê winda îro ji Rûdawê re axivî.
Siyamend Wehab diyar kir ku birayê wî meha Nîsanê çûye Hewlêrê û li şûştingehekê xebitiye.
Metîn piştî du mehan ji bo derxistina karta niştimanî vegeriyaye malê.
Li gorî gotina Siyamend Wehab, birayê wî meha Tîrmehê ji malê derketiye û gotiye ku ew diçe li Pirdê bixebite.
Siyamend Wehab da zanîn ku heta 15ê Tebaxê haya wan jê çênebûye û got:
“Wê rojê vîdeoyek ji birayekî min re şand û tê de got, ez li Rûsyayê me û li ser sînor şerê Ukraynayê dikim.”
Malbatê di dema lêgerînê de xwe gihandiye ciwanekî din ê Kurd ku nasê wan e û li bajarekî din ê Rûsyayê şer dike.
Wî ciwanî ji malbatê re gotiye, “Gelek Kurd û Erebên Îraqê di nav me de hene.”
“Xanî, pasaport û jinan didin”
Siyamend Wehab li ser çawaniya çûyîna birayê xwe jî anî ziman:
“Bi xwesteka xwe çûye, ne bi zorê ye lê ji wan re gotine kar gelekî baş e, meaş zêde ye, xanî, pasaport û jin misoger in.
Ji ber vê yekê ciwan dixapin û diçin lê ji wan re nabêjin ku ew dê biçin eniya şer.”
Siyamend Wehab bangî Serokatiya Herêma Kurdistanê û Encûmena Wezîran kir ku li aqûbeta birayê wî bipirsin û got, “Em tenê dixwazin bizanin bê ma ew sax e an miriye.”
