Hewlêr (Rûdaw) - Çavdêrîgeha Mafên Mirovan a Sûriyeyê (SOHR) ragihand ku komên çekdar ên girêdayî Hikûmeta Demkî ya Sûriyeyê li Helebê 2 xwendekarên Kurd ên zanîngehê revandin.
Li gorî SOHRê, bûyer dema ku xwendekar ji Zanîngeha Helebê vedigeriyan malên xwe qewimiye.
Her du xwendekarên ku li taxên Şêx Meqsûd û Eşrefiyeyê dijîn, li Fakulteya Endezyariya Avahîsaziyê dixwînin.
Yek ji wan xwendekara sala duyem û yê din jî xwendekarê sala yekem e.
"Bi zorê hatine revandin"
Şahidan ji SOHRê re diyar kir ku çekdaran li Cadeya Zohûrê rê li ber xwendekaran girtiye û ew bi zora çekan ew revandine.
Hat diyarkirin ku demjimêr derdora 12:00an pêwendî bi wan xwendekaran re qut bûye û sedema revandina wan nayê zanîn.
Malbatan bangî rayedaran kir
Malbatên xwendekaran bangeke lezgîn li raya giştî û aliyên pêwendîdar kir û xwest ku çarenivîsa zarokên wan were eşkerekirin.
Malbatan destnîşan kir ku zarokên wan tenê mijûlî xwendina xwe ne û ti pêwendiya wan bi karên siyasî re nîne.
Komên çekdar ên girêdayî Hikûmeta Veguhêz a Sûriyeyê ev demeke taxên Kurdan ên Helebê dorpêç kirine û rê nadin ku pêdiviyên sereke yên jiyanî derbasî wan deran bibin.
Komên çekdar her wiha rê nadin ku kes derbasî wan taxên Şex Meqsûd û Eşrefiyeyê bibe.
.jpg&w=3840&q=75)