Hewlêr (Rûdaw) - Berpirsa Siyaseta Derve ya Yekîtiya Ewropayê Kaja Kallasê ragihand, wezîrên karên derve yên welatên endam di yekîtiyê de gaveke "diyarker" avêt û Supaya Pasdaran a Îranê wekî rêxistineke terorîst nasand.
Berpirsa Siyaseta Derve ya Yekîtiya Ewropayê Kaja Kallasê derbarê mijarê li ser hesabê xwe yê Xê daxuyaniyek belav kir.
Kallasê got, " Wezîrên Karên Derve yên Yekitiya Ewropayê gaveke diyarker avêt û Supaya Pasdaran a Îranê wekî rêxistineke terorîst pênase kir.
"Ji bo hilweşîna xwe dikin"
Berpirsa Siyaseta Derve ya Yekîtiya Ewropayê hişyariyeke tund jî da berpirsên bilind ên Tehranê û got:
"Her rejîma ku bi hezaran kes ji gelê xwe dikuje, ji bo hilweşîna xwe dixebite."
Ev biryara Yekîtiya Ewropayê piştî çendîn hefteyên givaşên siyasî û dîplomatîk tê û wekî werçerxanekê di dan û standina Yekîtiya Ewropayê ya li gel Komara Îslamî ya Îranê de tê dîtin.
Dê çi were qedexekirin?
Ev biryar rê dide welatên Ewropayê ku tevahiya darayî û sermayeyên wê hêzê li Ewropayê bicemidînin, çûna nav axa Ewropayê li endamên wê qedexe bikin û her cûre dan û standina bazirganî li gel kompanyayên ser bi Supaya Pasdaran ve wekî "tawana terorîstî" bê qebûlkirin.
Ev gava Brukselê di heman demê de ye li gel gefên tund ên Donald Trump û şandina keştiyên şer ên ji bo herêmê.