Hewlêr (Rûdaw) - Ajansa Nûçeyan a Çalakvanên Mafên Mirovan a Îranê (HRANA) ragihand ku di xwenîşandanên ji ber pirsgirêkên aborî dest pê kirine de hejmara kesên canê xwe ji dest daye derketiye 65an.
Di rapora ku li ser malpera Ajansa Nûçeyan a Çalakvanên Mafên Mirovan a Îranê (HRANA) ya ku navenda wê li Amerîkayê ye de hat weşandin, derbarê xwenîşandanên ku li Îran û Rojhilatê Kurdistanê 13 roj in didomin de agahî hatin dayîn.
Di raporê de hat diyarkirin ku di xwenîşandanên li 31 parêzgehên Îran û Rojhilatê Kurdistanê belav bûne de, 7 jê zarok bi giştî 50 çalakvan û 15 endamên hêzên ewlehiyê mirine.
Her wiha hat destnîşankirin ku li seranserî Îran û Rojhilatê Kurdistanê 2 hezar û 311 kes hatine desteserkirin.
Di raporê de hat tekez kirin ku di bûyeran de bi dehan kes birîndar bûne û birîndarbûn bi piranî ji ber guleyên saçme û plastîk çêbûne.
Rayedarên Îranê derbarê mirî û birîndaran ti daxuyaniyên fermî nedane.
HRANAyê doh di rapora xwe ya roja 12an de ragihandibû ku hejmara miriyan derketiye 42yan û ya desteserkiriyan jî derketiye 2 hezar û 277an.
Xwenîşandanên ku 28ê Kanûna Pêşîn a 2025an li Îran û Rojhilatê Kurdistanê ji ber bêqîmetbûna pereyê herêmî û pirsgirêkên aborî ji aliyê esnafên Bazara Mezin a Tehranê ve hatibûn destpêkirin, li gelek bajaran belav bûn.
Ajansa Nûçeyan a Tesnîmê ragihandibû ku hejmara polîsên birîndar derketiye 568an û ya endamên Besîcê jî derketiye 66an.
Di bûyeran de zerer gihîştiye sazî û wesayîtên fermî û doh li Tehranê hişyariya "dernekevin derve" hatibû dayîn.
.webp&w=3840&q=75)