Hewlêr (Rûdaw) - Hikûmeta Îranê di germiya xwenîşandanan de 4 roj in înterneta tevahiya Îran û Rojhilatê Kurdistanê qut kiriye.
Saziya NetBlocksê ragihand ku armanca vê gavê "çewisandina nerazîbûnan e."
Şeva pêncşemê bi berfirehbûna xwenîşandanên li Tehranê û bajarên din ên mezin re xetên înternetê ji nişka ve qut bûn.
Ji wê demê ve tenê hesabên medyaya fermî ya hikûmetê tên nûkirin û şirketên çavdêriya înternetê vê qutbûnê wekî "plankirî" bi nav dikin.
Şirketa Censysê ya Koreya Başûr di rapora xwe de amaje bi kêmbûna bikarhêneran kir û got:
"Me kêmbûneke berbiçav di hejmara bikarhênerên IPv6 û IPv4an de dît."
Cloudflare Radarê jî ragihand ku şeva pêncşemê saet 20:00an (bi dema Tehranê) bikaranîna înternetê bilez kêm bûye û di nava 30 xulekan de ji sedî 90 daketiye.
Tevî qutbûna înternetê jî li Îran û Rojhilatê Kurdistanê xwenîşandan didomin.
Şeva înê hinek kanalên ku weşana nerazîbûnan dikin ragihand ku wan bi rêya înterneta Starlinkê xwe gihandiye torê û dest bi belavkirina dîmenên xwenîşandanan kiriye.
Xwenîşandanên ku ji ber krîza aborî û daketina nirxê tumen li Îran û Rojhilatê Kurdistanê dest pê kiribûn, ev 15 roj in didomin.
Li gorî Ajansa Nûçeyan a Çalakvanên Mafên Mirovan a Îranê (HRANA), di xwenîşandanan de heta niha 65 kesan canê xwe ji dest daye û zêdetirî 2 hezar û 300 kesî jî hatine desteserkirin.
Rayedarên Îranê berê jî di demên xwenîşandanan de înternet qut kiribû ku rê li ber belavbûna dîmenên tundiyê û organîzekirina çalakiyan bigirin.
