Hewlêr (Rûdaw) - Sekreterê Ewlehiya Neteweyî ya Îranê Elî Larîcanî li ser banga Donald Trump serkirdeyên Amerîka û Îsraîlê wekî "kujerên rastîn" bi nav kirin.
Sekreterê Ewlehiya Neteweyî ya Îranê Elî Larîcanî li ser hesabê xwe yê Xê bersiv da daxuyaniyên Serokê Amerîkayê Donald Trump.
Elî Larîcanî got, “Em navên kujerên sereke yên xelkê Îranê radigihînin: 1- Trump, 2- Netanyahu.”
Ev daxuyaniya Larîcanî wekî bertekekê li hemberî peyama Donald Trump hat ku tê de daxwaz ji xwepêşanderan kiribû "navên kujer û şkencekaran tomar bikin û biparêzin."
Trump her wiha soz dabû xwepêşanderan ku ew kesên şkencekar dê di paşerojê de "bacên giran" bidin.
Banga Trump a ji bo "welatparêzên Îranê"
Piştî ku Trump îro di platforma "Truth Social" de peyamek ji bo "welatparêzên Îranê" weşand û daxwaz ji wan kir ku dest deynin ser saziyên welat, tansiyon hîn zêdetir bilind bû.
Trump eşkere kir ku wî hemû civînên xwe yên bi berpirsên Îranê re betal kirine û wekî mercekî ji bo destpêkirina dan û standinan "rawestandina kuştina bêwate ya xwepêşanderan" diyar kir.
Serokê Amerîkayê di dawiya peyama xwe de dirûşma "Bila Îran ducare bibe welatekî mezin (MIGA)" bi kar anî û got, "Alîkarî di rê de ye."
"Yekser Îranê biterikînin"
Wekî nîşaneyekê ji bo xeteriya rewşê, Balyozxaneya Amerîkayê ya ji bo karên Îranê hişyariyeke lezgîn da welatiyên xwe û got, "Hema niha Îranê biterikînin."
Balyozxaneyê ji Amerîkayiyan xwest ku ji bo veguhastinê baweriya xwe bi hikûmetê neynin û planên xwe yên derketinê bi xwe amade bikin.
