Hewlêr (Rûdaw) - Ajansa Çalakvanên Mafên Mirovan a Îranê (HRANA) ragihand ku di xwenîşandanên li Îran û Rojhilatê Kurdistanê de 5 hezar û 459 kes hatine kuştin.
Ev hejmar nêzîkî 2 hezar û 400 kesan ji amara fermî ya hikûmetê zêdetir e.
HRANAyê îro di raporekê de hûrgiliyên ziyanên canî yên xwenîşandanên ku 28ê Kanûna Pêşîn a 2025an dest pê kiribûn belav kirin.
Li gorî amaran, heta doh kuştina 5 hezar û 459 kesan hatiye piştrastkirin ku 60 ji wan zarok in û 208 kes jî ji hêzên ewlehiyê ne.
HRANAyê amaje bi wê yekê jî kir ku ji bilî vê hejmarê, ew li ser kuştina 17 hezar û 31 kesên din jî lêkolînan dikin ku hîn belgeyên tam li ser wan nehatine komkirin.
Rewşa birîndar û girtiyan
Ajansê derbarê rewşa birîndar û girtiyan de jî ragihand ku birînên 7 hezar û 403 xwenîşandaran giran in.
Ajansê her wiha eşkere kir ku heta niha li bajarên cuda yên Îran û Rojhilatê Kurdistanê 40 hezar û 887 xwenîşandar hatine desteserkirin.
Hikûmet çi dibêje?
Li aliyê din, Encumena Ewlehiyê ya Îranê 21ê Kanûna Paşîn di daxuyaniyekê de hejmara qurbaniyan wekî 3 hezar û 117 kes ragihandibû.
Li gorî daxuyaniya hikûmetê, ji wê hejmarê "2 hezar û 427 kes xelkê bêguneh û hêzên ewlehiyê bûne."
Xwenîşandanên ku destpêkê ji aliyê esnafên Tehranê ve li dijî giraniyê û daketina bihayê tumen dest pê kiribûn, paşê berfireh bûn û tundiyeke zêde tê de çêbû.
Li gorî amarên Komîsyona Ewlehiya Neteweyî ya Parlamentoya Îranê, di xwenîşandanan de ziyan gihîştiye 250 dibistan, 300 mizgeft, 90 navendên zanistî yên Şîeyan û 2 hezar û 221 otomobîlên hêzên ewlehiyê.
