Hewlêr (Rûdaw) - Çavkaniyên herêmî û leşkerî îdia kir ku di êrişên asmanî yên dawî yên Îsraîlê de Wezîrê Parastinê yê Îranê Ezîz Nesîrzade û Fermandarê Hêzên Bejahî yê Supaya Pasdaran Mihemed Pakpur mirin.
Di demekê de ku êrişa Amerîka û Îsraîlê ya li ser armancên stratejîk ên li xaka Îranê didome, hat îdiakirin ku derb li asta fermandariya leşkerî ya Tehranê ketiye.
Reutersê spart çavkaniyan
Ajansa nûçeyan a Brîtanyayê Reutersê nûçeya xwe spart du çavkaniyên ku rasterast agahdarî li ser êrişên Îsraîlê hene û berpirsekî bilind ê li herêmê.
Li gorî nûçeya Reutersê, Wezîrê Parastinê yê Îranê Ezîz Emîr Nesîrzade û Fermandarê Hêzên Bejahî yê Supaya Pasdaran a Îranê Mihemed Pakpur di dema êrişan de hatine kuştin.
Di nûçeyê de hat diyarkirin ku her du nav jî di pêla yekem a êrişê de li navendên fermandariyê yên ku bûbûn armanc û tê nirxandin ku wan di encama êrişa dawî de canê xwe ji dest daye.
Îran bêdengiya xwe diparêze
Hatibû ragihandin ku di êrişa berfireh a ku serê sibehê dest pê kiribû de, ne tenê tesîsên nukleerî û mûşek lê di heman demê de biryarderên siyasî û leşkerî yên rejîmê jî hatine armanckirin.
Derbarê van îdiayan de heta niha ji aliyê rayedarên Tehranê ve ti daxuyaniyên fermî yan jî redkirinek nehatiye dayîn.
Çavkaniyên serbixwe û çavdêrên navneteweyî jî heta niha zanyariyên li ser kuştina her du kesên payebilind piştrast nekirine.